Biate – Bungzung kawng hawng

Biate – Bungzung kawng hawng
Hrangturzo bialtu MLA, minister Lalchamliana chuan Ningani khan Biate leh Bungzung inkalpawhna kawngpui siam a hawng.
A bial chhung Biate khaw mipui ngaihpawimawh leh nghahhlelh em em, Biate atanga Bungzung panna kawng laihtlanga hawn a ni ta chu lawmawm a tih thu Lalchamliana hian a sawi a. Champhai lam thleng pawha inkalpawhna tangkai tak a nih zel a beisei tih a sawi a ni.
Biate atanga Bungzung panna kawng, Khawchhak Tuipui thleng hi km.11 vela thui a ni a; km.5 thleng laih sa a awm a, MLA fund cheng nuai 24.1 hmangin km.6 laih leh a ni. Khawchhak Tuipui paltlang Biate atanga Bungzung panna kawng hi km.22 vela thui niin, Bungzung lam atangin East Tuipui bialtu MLA Ramthanmawia’n a MLA Fund leh ni za inhlawhna hmangin Khawchhak Tuipui thleng laihtlang a ni bawk.