Loneitute IT hman tangkaina hrilh

Loneitute IT hman tangkaina hrilh
Mizorama loneituten tunlai hmasawnna – information and communication technology tangkai zawka an hman theih dan tur inhrilhhriatna chu Ningani khan Aizawlah neih a ni.
He hun hmanpuitu Agriculture minister C Lalrinsanga chuan ICT hmanraw chi hrang hrang chu loneitu tam takin an hmang tangkai tan hle a, lo neih dan kalphung pawh zawi zawiin a siamtha chho mek tih a sawi. ICT kan neihsate chu tih changtlun a, loneitu tam zawkte thleng phaka hma lak a ngaih thu a sawi a. Mizo tawng chu ICT hmanraw hrang hrangah telh zel nise, loneituten an tangkaipui zawk zia tur thu a sawi. Mizoramin KVK kan mamawh belh thu pawh sawiin, Visit Agriculture Mission hnuaia hmalakna kal chho turah pawh ICT chuan hmun pawimawh tak a luah a beisei thu a sawi bawk.
ICAR-NCIPM New Delhi director Subash Chander chuan loneituten chemical fertiliser leh pesticide a chuangliama an hman thin chuan nghawng thalo tak a nei tih sawiin, “Biofertiliser leh biopesticide hmang tam tura hma lak a pawimawh a, hemi atan hian ICT hi a tangkai hle dawn a ni,” a ti.
ICAR-NCIPM scientist Dr Meenakshi Malik pawhin loneitute hnena ICT hman tangkai dan zirtir chu a pawimawh hle, tiin, loneitu tamzawk huapzo a nih theihna’n theih ang anga hma lak a ngai tih a sawi.