BIHAR INTHLAN: Mahagathbandhan pawhin dinna tur bial tifel

BIHAR INTHLAN: Mahagathbandhan pawhin dinna tur bial tifel
Bihar assembly inthlan hnai zelah reorel lai tangrualin dinna tur bial an insem fel tih an puan tukah eptu tangrual, Mahagathbandhan chuan chawlhkar eng emaw zat an sawiho hnuah an inching fel thei ta nia sawi a ni a. Party lian pahnih, Lalu Yadav-a kaihhruai Rashtriya Janata Dal (RJD) leh Congress chu a hmaa dinna an duh zat atanga inhnuk hniam ve vein RJD-in 134 leh Congress-in 135 an chang dawn nia sawi a ni.
RJD hian bial 144-a din an duh laiin bial kuain an inhnuk hniam a. Congress pawhin bial 70-a din an duh laiin pakua bawkin an inhnuk hniam niin sawi a ni.
Bihar-ah hian bial 243 a awm a, a la bangte hi Left Front leh Mukesh Sahni kaihhruai Vikassheel Insaan Party (VIP)-ten an inchan sem tur a ni dawn a. Left Front – CPIML, CPI leh CPM te chuan bial 29-31 changin VIP-in 16 an chang ang.
Eptu tangrual zinga buaina lian dang pakhat chu chief minister atana zawrh tur a ni a, Congress chuan an zinga mi an duh laiin tuna a lan danah chuan RJD hruaitu, Tejashwi Yadav-a chu an zuar dawn niin a lang a. Deputy atana zawrh tur an nei dawn em tih erawh sawi a awm rih lo.
Congress hian a tiarah chuan bial 70 chuanga din an duh a, an chakna ngei tur niin an inngai bawk a. An phut a hlawhtlin theih nan hian an zinga mi ni lo, Yadav-a chu chief minister-a thu tura zawrh pawh an phal a. Hetih rual hian Yadav-a hian chief minister tur a ni tih sawi fo mah se anni chuan an sawi chhuak ve ngai lem lo.
Party lian pahnih inpawhna karah hian zawmtu thar dang pahnih, Jharkhand-a JMM leh India Inclusive Party (IIP) an nei a. Party paruk – RJD, Congress, CPI, CPM leh VIP te nen an an ni ta a, bial dinna inchan sem dan a harsa sawt thung.
Hnam hnuaihnung zawktea tla na tak, Sahni-a kaihhruai VIP hian bial 50-a din ve an duh bakah hnehna an chang a nih chuan deputy chief minister chanvo chelh ve an phut bawk.
JMM-in an zawm hnuah hian bial pek ve an ngai bawk a, Jharkhand-ah hian RJD leh Congress hi an kaihhruai sorkara tel ve an ni a. RJD hian JMM tan an dinna bial an kian ang a, Congress-in IIP tan an kian then ve bawk dawn nia sawi a ni.
Hetih lai hian Pathianni zan khan Union Minister Dharmendra Pradhan-a chuan BJP kaihhruai NDA tangruala tel party telten an dinna tur bial zat an insem fel thu hi X-ah a tar lang a. BJP leh Chief Minister Nitish Kumar-a kaihhruai, Janata Dal United chu bial 101 ve veah an ding dawn a ni.
Upendra Kushwaha kaihhruai, Rashtriya Lok Morcha leh Jitan Ram Manjhi-a kaihhruai, Hindustan Awam Morcha (HAM) chuan bial ruk ve ve an chang dawn niin BJP atanga inthlan in-charge Pradhan hian a tar lang a ni.
Chirag Paswan-a kaihhruai, Lok Janshakti Party (Ram Vilas) chuan bial 29 an chang dawn bawk.
Bihar inthlan hi November 6 leh 11-ah thawh hniha neih tura puan tawh a ni a, November 14-ah vote chhiar a ni ang.