Afghanistan-Pakistan buaina ching fel turin Trump a inpeih

Afghanistan-Pakistan buaina ching fel turin Trump a inpeih
Pakistani sipaite chu kar tawpa Afghanistan nen ramria an inkaha mi eng emaw zat an thih hnuah Thawhtanni khan an inring hle a. Hetih lai hian US President Donald Trump-a chuan an inrem lohna titawp tura puih a inhuam thu a sawi.
Pakistan-in km 2,600-a thui ramri chu an inkalpawhna a khar avangin insumdawn tawnna a tawp vek rih a, lehlam lehlamah bungraw phur tam tak an ding niin Pakistani industry aiawhtuin a sawi.
Inrinni zan atanga inkahna chhuakah sipai tam tak an thi a, hei hi kum 2021-a Taliban-in Kabul-a thuneihna an chan leh hnua inthenawm ram an inbeihna nasa ber a ni.
Tangrual dun thin ram pahnihte hi Islamabad-in Taliban hnenah Pakistan beitu hel an khawite laka hma la tura a tih atangin an innghirngho tan a, Afghanistan chu him taka helho lennaah a chhuah.
Taliban chuan Afghanistan-ah Pakistani hel tumah an awm lo niin a sawi ve thung.
Pakistan chuan kartawpa inbeihnaah khan sipai 23 an hloh niin an insawi a. Taliban chuan an fighter pakua thiin an saiw ve thung a. Lehlam lehlam hian an khingpuite chu an insawi zat aia tam ve ve thi niin an sawi bawk a, finfiahna a awm thei lo.
Pakistani venhim hna thawktu hotu pakhat chuan, “Inrinnia tul lo taka Afghan Taliban sipaiten min beih atangin ramri khar vek a ni,” tiin Reuters a hrilh.
Pakhat dang chuan Pathianni zan pawh khan silai puak la awm zeuh zeuh mah se a tlangpui thuin boruak a muanawm tawh niin a sawi.
Afghan defence ministry thupuangtu, Enayatullah Khowarazmi chuan ramri chu ‘tun dinhmunah chuan boruak a pangngai’ niin Reuters a hrilh ve bawk.
Afghan Taliban Foreign Minister Amir Khan Muttaqi-a chuan Afghanistan chuan tute mah do a duh lo va, a thenawmte lakah Kabul chu a lawm em em reng niin a sawi.
“Indo hi buaina chin felna a ni lo va, inbiak a tul zawk a, chu kan kalphung pawh a ni,” tiin Muttaqi-a hian Indian khawpui, New Delhi-a thuthar lakhawmtuten an kawmnaah a sawi a, India hi kum 2021 hnua a vawi khat nan a tlawh mek.
Pakistani sorkar thuneitu pakhat chuan ramri kân lirthei leh kea kal dan vek a nih avangin ramria sumdawnna leh inawpna lam pisate pawh khar vek tura tih a ni tih a sawi.
“Bungraw phur lirtheite chu ramri lehlam lehlamah an ding teuh,” tiin Pak-Afghan Joint Chamber of Commerce & Industry Senior Vice President Zia Ul Haq Sarhadi chuan a sawi.
“Thei leh thlai thar bakah thil thawn chhuah leh lak luh tam tak an phur a, sumdawnna a kal thei loh avangin cheng maktaduai tel hloh a ni dawn a ni,” a ti.
Afghanistan hi tuipui kam nei lo an nih avangin Pakistan hi bungrua leh ei tur an lak luhna ber a ni.
Indona chhuak hi Trump-a pawhin a ngaihven hle a, Washington atanga Israel pana Air Force One-a a chuan laiin, “Ka lo kir hun ka nghak ang a, a dang tihfel tur ka nei a, buaina ching fela indona titawptu atan ka tha em em a ni,” a ti.
Afghanistan leh Pakistan ritu, China pawhin ram pahnih chu inbengdai tur leh biak a inpeih thu a sawi a. “China hian Pakistan-Afghanistan inkar siam that a inpeih reng a ni,” tiin foreign ministry thupuangtu, Lin Jian-a chuan Thawhtannia Beijing-a thuthar lakhawmtute a kawmnaah a sawi.
Kabul chuan Pathianni khan Qatar leh Saudi Arabia ngenna angin inkah an titawp tih a lo sawi tawh.