Modi-a’n mi hren chhuah leh Trump-a hmalakna fak

On Oct 15, 2025 6 0

Modi-a’n mi hren chhuah leh Trump-a hmalakna fak
Prime Minister Narendra Modi-a chuan Hamas-in Israeli an hrente an chhuah ta chu lawmawm a tih thu a sawi a, US President Donald Trump-a’n muanna a awm theih nana a thawhna leh Israeli Prime Minister Benjamin Netanyahu-a’n ‘chin fel duhna khawng tak’ a nei chu a fak bawk.
“Kum hnih hren an nih hnua chhuah an ni ta hi lawmawm kan ti a. An zalenna hi an chhungte huaisenna, President Trump-a’n muanna atana hma a lakna leh Prime Minister Netanyahu-a’n chin fel duhna tak tak a neih rah a ni a. President Trump-a’n heng lai hmuna remna a awm theihna atana rim taka a thawhna hi kan fak a ni,” tiin Modi-a hian Thawhtanni khan X-ah a tar lang.
Modi-a’n hetiang a puan hma hian Israeli Defence Forces (IDF) chuan kum hnih chuang Gaza-a Hamas-ten an hren tawh Israeli la damte an chhuah tih an puang a ni.
“Vawiin hian ni 738 hnuah mi hren dam lai 20 chu an lo haw ta a. Israel mipuite leh mihring inlainatna pawm tlattute tan a ni,” tiin IDF thupuangtu, Effie Defrin-a chuan a sawi a, an ram hian Simchat Torah an hman hma chiahin hruai haw an duh mi hrente hi chhuah an ni.
India hian October 7, 2023-a Israel beih a ni leh a hnua Israel-Hamas buaina avanga mi tam tak an thi kha tha a tih loh thu a lo sawi tawh thin.
“India chuan mi hrente chhuah te, inkahhai leh inbiakna leh palai hmanga muanna tluantling a awm hi a duh ber a ni,” tiin Ministry of External Affairs (MEA) chuan a sawi.
Hetih rual hian India him, a hun leh chatlak lova Gaza-a mipui awmte tana puihna pek luh chu tha a tih thu a sawi bawk.
India hian indona a awm lai khan a theih ang angin a tanna leh a dinna hi a lo sawi tawh a. UN, BRICS, NAM, Voice of Global South leh hmun dang dangah buaina tha a tih lohzia leh chin fel tul a tihzia a sawi thin.
Prime minister leh external affairs minister chuan Israeli leh Palestinian president, prime minister leh foreign minister theuhte leh ram dang hruaitute pawh vawi eng emaw zat biain buaina chin fel a nih theih nana hma la turin a lo ngen tawh thin a ni.