Billboard 200 leh Hot 100-ah Morgan Wallen a la No.1

Morgan Wallen chu Billboard 200 (albums) chart leh Billboatd Hot 100 (singles) chart-ah a No.1 a, a album ‘One Thing at a Time’ chu Billboard 200-ah hian a zawnin kar ruk a No.1 tling ta a, he album-a a hla ‘Last Night’ chu Billboard Hot 100-ah kar thum a No.1 tling ta bawk.
Billboard 200:
Morgan Wallen album ‘One Thing at a Time’ chu Billboard 200 (albums) chart-ah a No.1 a, he chart-a a zawna kar ruk a No.1-na a ni ta a, hetihrual hian NF ‘Hope’ chu chart Top 10-ah a debut a, Linkin Park album hlui ‘Meteora’ pawh a kum 20 tlin champha puala an tlangzarh nawn leh chu top 10-ah a lang leh bawk.
Billboard 200 hi kar khat chhunga US-a album hralh tam dan atanga teha chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin 1,67,000 hralh lehin hei hi chart-ah a No.1 pui leh ta a, 1,58,500 chu streaming atanga album hralhna tlukpui (on-demand official stream maktaduai 211.05) niin, album tak tak hralh zat chu 6,000 a ni a, album-a hla mal hralhna atangin 2,500 a tling thei bawk.
NF album thar ‘Hope’ chu 1,23,000 hralhin No.2-ah a debut a, album tak tak hralh zat chu 80.500 niin, streaming atangin 41,500 (on-demand official stream maktaduai 56.85) leh album-a hla mal hralhna atangin 1,000 a tling thei bawk. NF tan ‘Hope’ hi chart top 10 kai thei album pali a neihna a ni.
Chart No.1 hlui Taylor Swift ‘Midnight’ chu copy 60,000 hralh lehin No.6 atangin No.3 a kai thar leh a, chart No.1 hlui bawk SZA ‘SOS’ chu 60,000 tling lo deuh hralh lehin No.5 atangin No.4-ah a insawn thar leh a, Martinez ‘Portal’ chu 48,000 hralh lehin No.2 atangin No.5-ah a tawlh ve thung.
Chart No.1 hlui bawk Morgan Wallen ‘Dangerous: The Double Album’ chu 47,000 hralh lehin No.8 atangin No.6 a kai thar leh a, Luke Combs “Gettin’ Old” chu 46,000 hralh lehin No.7-ah bawk a la awm.
Linkin Park No.1 album hlui Meteora chu a kum 20 tlin champha puala 20th anniversary deluxe reissue chu 38,500 hralhin No.8 a kai thar leh a. He album hi an hla hit ‘Numb’ leh ‘Faint’ awmna kha a ni. He album hi April 2003 khan chart No.1 a lo kai tawh a ni. He album-ah hian Meteora atana an record, mahse, album-a an telh tak loh ‘Lost’ an dah tel a, he hlaah hian an band vocalist 2017-a mual liam taw Chester Bennington aw hriat tur a la awm a ni.
Chart top 10 khartu pahnih te pawh chart No.1 hlui ve ve niin, Metro Boomin ‘Heroes & Villians’ chu 36,000 hralh lehin No.9-ah bawk a la awm a, Bad Bunny ‘Un Verano Sin Ti’ chu 35,000 hralh lehin No.11 atangin No.10 a kai thar ve leh ta bawk.
Billboard Hot 100:
Mrogan Wallen ‘Last Night’ chu Billboard Hot 100-ah No.1 ni lehin, a zawn ni kher lovin he chart-a kar thum a No.1-na a ni a, Drake ‘Search & Rescue’ chu No.2-ah debut-in, Eslabon Armado leh Peso Pluma te ‘Ella Baila Sola; chu top 10-ah a lang thar bawk.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Morgan Wallen ‘Last Night’ hi stream maktaduai 36.6 leh download sales 10,000 a la tling a, radio airplay-ah pawh ngaithla maktaduai 34.5 nei angin an la chhut a, hei hi chart-ah a No.1 pui leh ta a ni.
Drake hla thar ‘Search & Rescue’ chu stream maktaduai 33.8, download sales 3,600 leh radio airplay maktaduai 6.9 tlingin, chart No.2-ah a debut a, he chart-a a hla top 10 kai thei 68-na niin, kumina he chart-a a hla top 10 kai thei hmasa ber a ni bawk. Drake hian Hot 100 chart-a top 10 kai thei hla ngah ber a nihna chu a sawhnghet zel a ni. Hot 100 chart-a top 10 kai thei hla ngah lamah Drake hi Taylor Swift (40), Madonna (38), The Beatles ( 34), Rihanna (32), Michael Jackson (30), Elton John (29), Mariah Carey (28), Stevie Wonder (28) leh Janet Jackson (27) ten an dawt.
Chart No.1 hlui Miley Cyrus ‘Flowers’ chu No.3-ah bawk a la awm a, SZA ‘Kill Bill’ chu No.2 atangin No.4-ah a tawlh a, Metro Boomin “Creepin'” chu No.4 atangin No.5-ah a tawlh a, Rema leh Selena Gomez ‘Calm Down’ chu No.7 atangin No.6-ah a insawn a, chart No.1 hlui The Weeknd leh Ariana Grande ‘Die for You’ chu No.5 atangin No.7-ah a tawlh a, PinkPantheress leh Ice Spice ‘Boy’s a Liar, Pt.2’ cu No.6 atangin No.8-ah a tawlh a, chart No.1 hlui Taylor Swift ‘Anti-Hero’ chu No.8 atangin No.9-ah a tawlh ve ta bawk.
Chart top 10 khartu chu Eslabon leh Peso Pluma ‘Ella Baila Sola’ niin, California chhuak quartet Eslabon Armado leh Mexican Peso Pluma te tan he chart top 10-a an lan vawi khatna ve ve a ni a, ‘Ella Baila Sola’ hi regional Mexican hla, Hot 100 chart top 10-a lang thei hmasa ber a ni bawk.