Billboard 200 leh Hot 100 chart-ah Morgan Wallen a No.1 ve ve

Billboard 200 leh Hot 100 chart-ah Morgan Wallen a No.1 ve ve
Morgan Wallen album thar ‘One Thing at a Time’ chu Billboard 200 (albums) chart-ah a No.1 a, hetihrual hian Billboard Hot 100 (singles) chart-ah pawh a hla ‘Last Night’ chu No.5 atangin No.1-ah a invawrh kai ta bawk. ‘One Thing at a Time’ hi a album Billboard 200 chart-a No.1 thei pahnihna niin, ‘Last Night’ hi Hot 100 chart-a a hla No.1 thei hmasa ber a ni ve thung.
Billboard 200 hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘One Thing at a Time’ hi kar khat chhungin copy 5,01,000 a hralh thei a, chung zinga copy 3,82,000 chu streaming atanga album hralhna tlukpui (on-demand official streams maktaduai 498.28) niin, country album-ah chuan kar khat chhunga US-a stream nasat ber record a la ni a, country chauh ni loah pawhin kar khat chhunga US-a stream nasat pangana a ni pha bawk. Album-a hla 38 awm te hralhna atangin album copy 7,500 hu a nei thei bawk a, album tak tak hral zat chu copy 1,11,500 a ni ve thung.
Billboard 200 chart-ah No.1 hlui SZA ‘SOS’ chu copy 82,000 hralh lehin No.2 a la ni a, Karon G ‘Manana Sera Bonito’ chu copy 60,000 hralh lehin No.1 atangin No.3-ah a tawlh ve ta bawk.
Kali Uchis album thar ‘Red Moon in Venus’ chu copy 55,000 hralhin No.4-ah a debut a, he chart top 10-a lang thei album a neih hmasak ber a ni. He album-a hla hi a tam zawk chu Spanish a ni a, he album-ah hian Omar Apollo, Don Toliver leh Summer Walker te nena an thawhhona hla te pawh a tel.
Chart No.1 hlui Taylor Swift ‘Midnights’ chu copy 48,000 hralh lehin No.5-ah bawk a la awm a, chart No.1 hlui Morgan Wallen album ‘Dangerous: The Double Album’ chu copy 46,000 hralh lehin No.6 a la ni a, he album hi January 2021-a a tlangzarh tawh kha niin, kar 10 chhung a No.1 thei a, tunah chuan a zawn ni kher lovin he chart top 10-ah hian kar 110 chhung a lang tling ta a, he chart top 10-a lan rei theihah pahnihna niin, solo artist-ah phei chuan he chart top 10-a lang thei ber a ni bawk.
Chart No.1 hlui Metro Boomin ‘Heroes & Villians’ chu copy 40,000 hralh lehin No.7-ah a la awm a, chart No.1 hlui bawk Bad Bunny ‘Un Verano Sin Ti’ chu copy 39,000 hralh lehin No.10 atangin No.8 a kai thar leh a, chart No.1 hlui bawk The Weeknd ‘Starboy’ chu copy 35,000 hralh lehin No.9-ah bawk a la awm a, chart No.1 hlui tho Drake leh 21 Savage ‘Her Loss’ chu copy 34,000 hralh lehin No.11 atangin No.10-ah a kai thar ve leh ta bawk.