Billboard ‘Latin Woman of the Year’ dawng tur Shakira

Billboard ‘Latin Woman of the Year’ dawng tur Shakira
Billboard chuan May ni 7 hian a vawi khat nan ‘Latin Women in Music’ event an buatsaih dawn a, etah hian Shakira chu Woman of the Year chawimawina hlan a ni ang. He event hi darkar hnih awh tur niin, Ivy Queen leh Jacqueline Bracamintes ten an host dawn a, rimawi khawvel a Latin hmeichhe che tha te chawimawina hun an hmang dawn a ni. Award semna event hi Watsco Center, Miami-ah May 6-ah an nei a, chu chu record-in, May 7-ah an tichhuak dawn a ni.
Latin music tan hetiang hi a vawi khatna tur a ni a, Latin hmeichhe zaithiam te bakah, rimawi khawvela kawng hrang hranga thawh hlawkte chawimawi an ni dawn a, Ana Gabriel, Emilia, Evaluna, Goyo leh Thalia te pawhin special award an dawng dawn a ni.
Shakira hi a kawppui Gerard Pique nen inthen mah se rimawi khawvelah chuan a kum that kum a tih theih ve thung a, Pique a kahna hla ‘BZRP Music Sessions #53’ pawh Billboard Hot 100 (singles) chart No.9-ah a debut a, Spanish hla hmanga he chart top 10-a hmeichhe zaithiam lang thei hmasa ber a ni a, he hla hi darkar 24 chhungin Spotify-a Latin hla stream nasat ber record siamtu niin, YouTube-ah hian a music video hian darkar 24 chhunga Latin hla video en nasat ber record siamin, vawi maktaduai 63 chuang en a hlawh hman a, Guinness World Record pawh 14 lai a siam thei a ni.
Shakira hian khawel huapin a record maktaduai 95 chuang a hralh tawh a, khawvela zaithiam record hralh tam pawl niin, Latin hmeichhe zaitiam-ah chuanhralh tha ber a la ni a, Latin hmeichhe zaithiam zinga YouTube-a en hlawh ber niin, Latin chauh ni lo, zaithiam dang zawng zawng zingah pawh YouTube-a en nasat top 10-ah a lang phaa, a music video hrang hrang ten YouTube-ah vawi tluklehdingawn 20 chuang en a hlawh tawh a, Spotify-a Latin hmeichhe zaithiam stream nasat ber a ni bawk.
Rimawi pawnlamah pawh Shakira hi midangte tana inpe leh thawh hlawk tak a ni a, kum 18 a tlinin, Pies Descalzos Foundation a din a, he foundation hian Cartagena, Barranquilla, Guajira leh Quibo-ah te public school pakua an sa ta a, tunah hian school dang paruk an sa mek bawk a, dollar maktaduai 40 chuang tuak ngah tawhin, naupang 1,50,000 bakah chhungkaw 9,00,000 dawnin an chhawr tangkai tawh a ni.