Disneyland a zawna vawi 2,995 tlawhin record siam

Disneyland a zawna vawi 2,995 tlawhin record siam
California a cheng Jeff Reitz chuan Dsneyland theme park chu a zawnin ni 2,995 chhung nitin a tlawh ziah a, Guinness World Record a siam. Ni 2,995 chu kum riat leh thla thum leh ni 13 tihna a ni!
Jeff hi Disneyland atanga minute 30 vel kala awm chu a ni nain, thenawm hnai tan pawh ni 2,995 chhung zet mai nitina tlawh ziah mai chu thil namai a ni lo ve tlat mai a ni. 2012 January ni 1-ah khan he theme park hi a thiante nen an tlawh a, chutah chuan leap year kum a nih avangin advertisement-ah ‘extra Disney Day’, February ni 29 atan an siam chu an hmu ta a ni.
Jeff Reitz chuan, “Fiamthuin, a ni dang zawng zawng pawh kan hman vek loh chuan engtin nge maw ‘extra day’ a nih theih bik ngawt ang le? kan ti a. Chutihlai chuan hnathawh kan la nei lo bawk a, a extra day hman tangkai tumin a ni dang zawng zawngah pawh kal kan tum ta a ni,” a ti.
Tichuan, an thianho chuan ni 366 chhung Disneyland-ah chuan nitin an kal ta a, chuta tang chuan a kal chhunzawm ta ngar ngar mai a ni. A tirah chuan a chhungten December 2021-a annual pass (kumtluana kal theihna) an pek chu a hmang a, a hnuah chuan medical center-ah hna a hmu ta a, ama tawkin pass a lei ve thei ta a ni.
A tirah chuan annual pass hi dollar 500 man vel niin a sawi a, a hnuah chuan dollar 1,400 te a ni ta a, “A to vak lo, a man an tihsan hnuah pawh ni khata dollar 3.50 vel chauh seng ang ka ni a, tute emaw coffee no khat leina ang vel chauh a ni,” a ti.
Jeff Reitz chuan Disneyland a kal hnuhnun ber chu March ni 13, 2020 kha a nih thu sawiin, chu chu COVID-19 hripui leng avanga he theme park an khar hma chiah a ni, ni 5-in ni 3,000 a tlin ta lo a ni.