Biren Singh-a hoin Manipur BJP MLA-te Delhi-ah châm mek

Biren Singh-a hoin Manipur BJP MLA-te Delhi-ah châm mek
Manipur-a BJP MLA rualte chu chief minister hlui, N Biren Singh-a hovin Delhi-ah an state-a sorkar thar siam dan tur dapin an awm mek.
Manipur-ah hian President’s Rule hman mek niin BJP MLA zingah H Dingo, Th Robindro, S Ranjan, minister hlui Govindas Konthoujam leh Hill Areas Committee Chairman Dinganglung Gangmei te chu Delhi-ah hian an awm mek a ni.
President’s Rule hi an state-a thla eng emaw zat chi leh chi inkara a buai hnuah February 13 atang khan hman tan a ni a, August thla khan thla ruk dang pawh sei turin parliament-ah pawm leh a ni.
Sorkar laipui hnuaia an awm chhung hian state assembly chu thiah a ni chuang lo va, hna thawk thei rih lo tura dah a ni a, hei hi BJP MLA-te chuan hmanga mipui thlan chhuahten ro an rel chhunzawm leh theihna tura thil tih dan an dap a ni.
Biren Singh-a hian BJP hotu lawkte hmua a hma thei anga Manipur-a sorkar din thar leh a nih theih nana nawr a tum a. “Mi ka kawmnaah kan buaina awm mek chin fel dan tur pawh ngaihtuah tel a ni dawn a, a bik takin mahni in lum chhuahsana hmun danga him nana khawsa mekte hi ngaih pawimawh a ni ang,” tiin Imphal Airport atanga Delhi a pan hma lawkin a sawi.
BJP MLA rualte hian Delhi-a an awm chhungin Union Home Minister Amit Shah, BJP National President J P Nadda leh Prime Minister Narendra Modi-a te hmuh an tum a. Hetih lai hian prime minister bik hi tih tur hmachhawp a ngah sa em avangin an hmu thei ngei dawn em tih a la chiang lo.
Tar lan tawh thin angin Manipur-ah hian phaizawla cheng, Meitei leh tlangram district-a cheng, Zo-Kuki inkarah May, 2023 atang khan buaina a chhuak a, mi 260 vel thi awm tawhin mi sang tel baihvaiin an awm phah mek a. Tun thlengin hnam hnih inkarah muanna tak tak a la awm thei lo.
Hetih lai hian Inrinni atang khan hnam hnih intihbuaina avanga kum hnih chuang chawlhsan tawh, postal service chu Churachandpur-ah chhunzawm leh a ni ta a. He district hi buaina chhuakin a tuam nasat ber zinga mi a ni.