Ruah sur nasa kaihhnawihah Derjeeling-ah mi 27 thi

Ruah sur nasa kaihhnawihah Derjeeling-ah mi 27 thi
West Bengal-a Darjeeling-ah ruah sur nasa lutuk avangin lei a min nasa a, kawngpui pawimawh tak tak a ping a, mi 17 vel thi an awm tawh a. Thuneitute chuan Himalaya tlangdunga Sikkim chu tlawhpawh theih a lo ni tih an sawi bawk.
Bengal hmar lam, Darjeeling-ah hian Inrinni zan khan ruah nasa taka surin Mirik leh Sukhia Pokhari-ah lei a min nasa hle a. Police leh tual chhung thuneituten chhanchhuah hna an thawk mek zel a, Chief Minister Mamata Banerjee-i chuan Thawhtanni hian a tlawh ang.
Prime Minister Narendra Modi-a chuan Darjeeling-a thi tam tak an awm chu pawi a ti tak zet tih a sawi a. “A tuartute puih theihna awm ang apiangah puih kan inhuam a ni,” tiin X-ah a tar lang.
Lei min hian kawngpui pawimawh tak tak a tiping a, Bengal leh Sikkim inkar leh Darjeeling leh Siliguri inkalpawhna pawh a ping tel.
Durga Puja zawhah Kolkata leh Bengal hmun dang atangin Darjeeling-a zin an tam hle a. Khualzin tam tak chu khuarel chhiatna thleng avang hian an tangkhang mek.
Buaina dang a awm belh zel loh nan Gorkhaland Territorial Administration chuan Tiger Hill & Rock Garden telin Darjeeling-a khualzinte tlawh thin hmunte chu a khar a. Toy train service pawh an titawp lailawk bawk.
Thuneitute chuan mi chengte leh khualzinte chu fimkhur taka awm tgur leh kawng leh khaw awm dan ngaihven hmasaa chhuak zel turin an ti a. Bengal police chuan khualzin leh mi cheng tangkhang leh harsatna neiten an biakpawh theihna tur hotline an siam bawk.
Darjeeling MP Raju Bista chuan ruah sur nasa avanga chhiatna thleng chu pawi a ti tak zet tih a sawi a. Thihna, thil hloh leh vantlang thil chhia tam tak a awm a, thuneitute nen thil thleng chu an ngaihvenin hma an la mek zel tih X-ah a tar lang.
Ruah sur nasa hian Bengal hmar lam hmun dang – Jalpaiguri, Siliguri leh Cooch Behar pawh tibuaiin hmun tam takah tui a tling.
Weather office chuan a hmain Bengal hmar lam leh Sikkim-ah ruah a sur nasa dawn tih hi an sawi lawk a. Sikkim tan red warning pahnih tichhuakin tek, ruah leh thli na angreng tak a thawk dawn tih an sawi a. Thawhlehni thleng hei hian a awh dawn niin an sawi bawk a. Bengal hmar lamah pawh tui lian a awm thei tih an sawi bawk.
Thlalak thehdarhah chuan lei chhia te, tuiin kawng a len bal leh khawlaia tui tling nasa takte hmuh tur a awm.