Birth certificate siam thei nia insawi lakah FIR thehlut

Birth certificate leh document dang siamsak thei nia social media lama inzuar an awm avangin Central YMA chuan heng mite lakah hian a tul anga hma la turin Aizawl Police Station-ah FIR an thehlut.
Central YMA president Lalhmachhuana hoin Thawhlehni khan Aizawl Police Station-ah FIR hi thehluh a ni a. Sawrkar department leh sawrkarin a ruat ni lo, mimal anga document siam thei nia inchhal an awm chu pawi an tih bakah an ngai thutak hle a, mipui leh sawrkar zah lohnaah a ngai, tiin, hetiang mi hi ram leh hnam hmelma nia ngaiin, langsar taka sual ngaihzamna nia an ngai tih an sawi a. Police-ten a ti tu chhui chhuak ngei se an duh tih an sawi a ni.
Hemi chungchangah tho hian Economic & Statistics department pawhin Cyber Crime Police Station ah FIR an thehlut nia thu dawn a ni a. Hetianga document siam thei nia insawi hi sawrkar dan kalh a nih dan tunhnai khan sawrkar chuan a tichhuak bawk a ni.