BJP-ah Dr Beichhua a lut

Tun sawrkar kal meka minister of state ni tawh, Siaha bialtu MLA a a nihna atanga bang hlim Dr K Beichhua chu October 6 zan khan Aizawlah Union Minister of State for Minority Affairs John Barla chuan BJP-ah a lawmlut.
Union MoS chuan 2018 inthlana MLA atana thlantlinin an party a zawm chu lawmawm a tih thu a sawi a. BJP chuan mi taima leh hnathawk tha apiang mipui tana rawng bawl turin a thlangchhuak thin tih a sawi. Amah pawh Kristian, mithiam leh mibik a ni hran lo chung leh, a bialah Kristian sing hnih-khat chauh an awm chungin, vote nuai 7 chuang hmu in thlantlin a ni a; amah mai niloin, BJP kaihhruai sawrkarah hnam tlem zawk leh sakhaw tlem zawk vuantu zingah ram hruaina kawnga chanvo pawimawh tak tak chelh an awm fur tih a sawi a ni.
“Mitinin an mamawh ang hmasawnna thlen thintu party kan nih angin mipui tana rawngbawl turin lungrual taka kan thawh tlan ngei ka beisei,” John Barla hian a ti a. Mizoram politician lar an party-a lut tur an la awm zel dawn tih a sawi bawk.
He hunah hian Nagaland deputy XM Y Patton, Assam Assembly deputy speaker Numal Momim, BJP National secretary leh NE joint coordinator Rituraj Sinha, Tripura State MLA pahnih te pawh an tel a ni.