BJP-in kawngkhar an nei em ni? – Kumar

Bihar-a Nalanda leh Sasaram khuaa communal tension leh tharumthawhna thlen hnuah Bihar Chief Minister Nitish Kumar chuan, “Phiarrukna ruahman lawksa thil a ni a, tharumthawhna phena thudik lailan a ni thuai ang,” tiin a sawi.
Tun hnaia Union Home Minister Amit Shah-an Bihar-a Nawada a tlawhnaa ‘Nitish Kumar tan BJP kawngka a inkhar chatuan tawh’ a tih chungchanga zawhna chu Kumar chuan, “Kawngka an nei em ni?” tiin a chhang a ni.
“Phiarrukna ruahman lawksa vek a ni a (Nalanda leh Sasaram) thudik lailan a ni thuai ang,” tiin Chief Minister Nitish Kumar chuan Patna a media mite hnenah a sawi a.
“Kan sawi leh tih te national media-ah tihchhuah a ni ngai lo, a chhan chu BJP tena an thunun vek vang a ni a. Tunah chuan Nalanda leh Sasaram-ah remna leh muanna a awm ta,” tiin Kumar chuan a sawi bawk.
Ram Navami kawngzawhna neih laiin Bihar-a Sasaram-ah communal violence thlengin Nalanda khuaah pawh a thleng tho va, Nalanda-ah hian mi pakhatin nunna a chan phah a. Vehicle tam tak halin a awm a, thuneitute chuan Section 144 an puang hial a. Sasaram-ah chuan security forces thahnem tak tirh luh an ni hial a ni.
April 2 khan Shah-an Sasaram a public meeting a neih tum chu Section 144 puan a nih avangin thulh a ni a, a hnuah erawh nawada tlawhin public meeting a nei tho thung a, chutah chuan Bihar Chief Minister Nitish Kumar tan BJP kawngkhar chu chatuanin a inkhar tawh tiin a sawi a ni.
Nitish Kumar hian Bihar Chief Minister ni reng turin politics-ah thil danglam tak tak a lo ti tawh a. August 2022 khan a party JD(U) te chuan BJP te nena an inzawmna chhu chatin Rashtriya Janata Dal, Congress leh party dang Left te pawh telin Mahagathbandhan (grand alliance) a din zui a ni.
Kumar chuan Hyderabad MP Asaduddin Owaisi kaihhruai All India Majlis-e-Ittehadul Muslimeen (AIMIM) leader te chu BJP tana thawkah a puh bawk a. “Media mite hian kan thusawi leh tihte national paper-ah a lang ve ngai lo va, AIMIM te chetlakna erawh an tarlang zel tih inhre lo em ni,” tiin a sawi bawk.