Economy hmasawnna sawi thei lo pawi ti

Parliament Budget Session ni hnih chauh a awm tawh tihah Finance Minister Nirmala Sitharaman chuan Union Budget sawihona an nei thei lo chu pawi a tih thu sawiin Opposition te chuan Indian economy a ‘positive’ awm te lak pen nan chet an la tia sawiin a bik takin tax collection pung nasa te chu sawi lanin a awm thei lo a ti a.
“Economy-a thil tha tam tak thleng te sawi lanna hun remchang tha Budget sawihonaa ka nei thei lo hi a pawi ka ti a ni,” tiin Sitharaman chuan a sawi a.
Modi sorkar chuan ‘langtlang leh tha tak’ budget kum tinin a pharh tiin a sawi a. “Budget hi document langtlang a ni a, sorkar sum hi engmah thuhruk awm lo turin chet kan la a, engkim mai Parliament-ah pharh vek a ni,” tiin a sawi bawk.
Kum tinin debate awm ngei se a duh thu sawiin member te atanga zawhna pawimawh tak te a awm thinin sorkar pawhin Budget a thil pawimawh te sawifiahna hun remchang a neih theih phah thin tiin a sawi bawk a.
Direct leh indirect revenue collection lamah hmasawnna awmin inflation enkawl theih chinah global economy tlakhniam ber lai pawhin a awm thei a ni tia sawiin Sitharaman chuan India chu major economy a thang chak ber a la ni mek zui zel a ti bawk a. “Indian economy hi success story a ni” tia sawiin, Goods and Services Tax (GST) collection chuan average-in Rs 1,50,000 crores a pha reng tia sawi bawkin net direct tax collection pawh tax rate tisang miah lo chungin pawhin kuminah 18% a hawlh pha tho tiin a sawi bawk.
Sitharaman thusawi hi World Bank leh Asian Development Bank ten India growth rate chu Thawhlehni a report an tihchhuahah tlahniam tura an dah lai a nih avangin pawimawhna a nei riau tura ngaih a ni a.
Opposition ten sorkar an beihna a bik takin Adani Group-Hidenburg Research chungchangah Sitharaman chuan Opposition te a bik takin Congress te chuan tactics hrang hrang hmangin ‘Indian economy hlawh tlinna mipui tena an hriatfiah loh nan chet an la a ni’ tiin a sawi bawk a.
Congress leader Rahul Gandhi criminal defamation case-a thiam loh chantir a nihna leh chumi avanga Lok Sabha member a nihna hlihsak chuan Opposition te chu ruling BJP te nena nasa zawka inbakkaihah a siam a.
Sitharaman chuan Gandhi-an membership a hlohna chhan chu dan vang zawk a ni tia sawiin chutih laiin Opposition te chuan Rahul Gandhi thusawi chu a ni lo zawnga sorkar chu la leh kalpuiah puhin sorkar bungalow a luah lai pawh chhuahsan rum rum tura an tihnaah an bei nasa bawk.
Opposition-te chuan Parliament ah lungawilohna lantir chhunzawm zelin Joint Parliamentary Committee (JPC) probe chu Adani issue-ah an ngiat bawk a. Hei hi sorkar lai BJP te chuan an hnawl thak thung avangin House chu rorel hlei thei lova siamin a awm zui zel a ni.
Kumin Parliament budget session chu rorel thei lova siam mek zui zel niin Nilaini pawh khan opposition tena nasa taka auela harsatna an siam avangin house pahnih rorel thei lova siamin a awm leh a ni.