BJP-in Mizoram inthlanah rusum thlak
Mizoram inthlanpui lo awm turah
BJP-in rusum an thlak a, an campaigner-te enin an tanzia leh theihtawp an chhuahzia hai rual a ni lo.
Union minister rual an campaign a, Mizoram cham chilh chawt an awm bawk. Prime minister Narendra Modi leh home minister Amit Shah te’n Mizorama zin an thulh na a, an mi hraw dangte erawh Mizoramah an campaign sup sup.
India ram party lian ni mah se Mizoramah chuan BJP hi an lian lo a, term kal laiah MLA pakhat neiin, hei hi MLA an neih hmasak ber a ni. Mizoram inthlanah hnehna chan beisei thei tura ngaih ni lo mah se sorkar thei dinhmuna ding ang maiin an campaign a, India sorkara minister leh BJP hruaitu pawimawhte’n Mizoram an tlawh zur zut.
India ram puma BJP president JP Nadda hial pawh Mizoramah hian a campaign a, defence minister Rajnath Singh te, India ram politician lar Nitin Gadkari, road transport minister te, Rajeev Chandrasekhar, minister of state for electronics and information technology te, MP leh mi pawimawh dangte an campaign a ni.
Union minister Kiren Rijiju, Arunachali phei chuan October ni 23 atangin Mizoram a cham chilh a, chawlhkar khat chuang Mizoramah a cham. Assam chief minister hlui Sarbananda Sonowal, union minister ni mek pawh a campaign a, Assam MP Sambit Patra hmarchhak state dang atangin Nagaland deputy chief minister Y Patton leh SP Sonuyak, MP leh an minister Temjen Imna Along te an campaign bawk.
Inthlan puan hmain minister leh BJP mi pawimawhte hi Mizoramah an campaign reng bawk.
Union minister-te hi minister ni mah se inthlan puan hnua inthlan campaign-a Mizorama zin an nih avangin Mizoram state sorkarin a lo buaipui thei lo a, venhim hnathawktu a pek bak chu thil dangin a buaipui lo. Mizorama chawlhkar khat chuang cham Kiren Rijiju pawh hotel-ah a thleng a ni.
BJP mi pawimawh, Mizorama campaign-a kalte hian Aizawl khawpuiah hun an hmang lo tia sawi theih a ni a, khawthlang lam leh chhim lamah deuh zel hun an hmang. Sorkar thar lo piang turah BJP MLA chu deputy chief minister a ni dawn tih chu an auhla pawimawh a ni a, inthlana thawhpui erawh an nei lo.