BJP sawrkar hnuaiah ram dinhmun a derthawng – MPCC president

BJP sawrkar hnuaiah ram dinhmun
a derthawng – MPCC president
Congress hruaitu Rahul Gandhi chunga BJP sawrkar chet danah ram leh a mipui dinhmun a derthawng hle tih Mizorama Congress president Lalsawta chuan a sawi.
MPCC president hian Congress hruaitu Rahul Gandhi chu BJP sawrkarna hnuaia Surat (Gujarat) court-in criminal defamation case-ah thiam loh chantirin kum hnih lung in tang tura a tih bakah MP atanga rang taka ban a ni tih a sawi a. Rahul Gandhi chu Congress party mi a nihna ang aiin, democracy tundin tuma hma laknaah a chungah na taka hma lak a ni tih a sawi.
Rahul Gandhi laka BJP sawrkar chet duh dan chu ram tan a himlo hle nia an hriat thu sawiin, “Party ang zawng pawh niloin tuna kan dinhmun en hian, BJP sawrkarna hnuaiah mipui nawlpuiin zalenna kan neih rahbeh mek nia a lan avangin, he thilah hian mipui pawhin party sawiloa kan ram himna kan ngaihtuah a hun niin ka hria,” a ti.
Mipuiin zalenna kan neih, freedom of speech pawh hnualsuatin inrahbehna lian a awm tih Lalsawta hian a sawi a. Rahul Gandhi chunga BJP sawrkarin hma a lak duh danah hian ‘dictatorship sawrkar’ ang maia kal an ang tawh tih a sawi.
Khawvel pum huapa thil dik lo puangchhuak ngam Rahul Gandhi chu dik lo taka bana lung ina tan tir ni mah se, a dik zia leh huaisen zia hretu mipui khawngaihna avangin a dikna hailan a la nih tur thu MPCC hruaitu hian a sawi bawk.
Kumin March 23 khan Congress president hlui Rahul Gandhi hi Hindi pawl Rashtriya Swayamsewak Sangh (RSS) chungchang a sawi danah, dik lo taka mi chungchang sawiah puh niin, Gujarat khawpui pakhat Surat court chuan thiam loh a chantir a, kum hnih lung in tang turin a ti a, hemi hnu hian MP a nihna pawh hlih sak zui nghal a ni. India ram pumah Congress party chuan Rahul Gandhi thlawpna kalpuiin, he thil hi BJP sawrkarin a phiarrukna, amah Rahul chungah mai niloin, ram mipui zalenna rahbehna a ni tih an sawi a ni.