Bonucci chawlh hun tur hriat tawh

Bonucci chawlh hun tur hriat tawh
Italy leh Juventus captain Leonardo Bonucci chuan season thar tawp ruala football a chawlhsan ve tawh tur thu a nemnghet.
Karliamta Europa League inkhel pakhata Turin club leh Seilla inkhelh tum khan Bonucci hian a team-mate rual nena thla a lak tumin ‘Bonucci 500’ tih inziahna Juve jersey chu dressing room-ah a lek chhuak a, kha match kha a club vawn lai tana match 500 a khelh tlinna a nih avangin club lam pawhin ngaihhruina atan ‘special Juventus shirt’ an hlan a ni.
Kum 36 mi ni ve tawh Bonucci hian Italian club hi tum hnih zawmin a zawm tawh a, chutih chhung chuan Serie A title pariat lakpui tling tawhin, Italy tan pawh game 120 a khel tling a, July 2021 khan England hneha Euro 2020 trophy hawn Italy team-ah player pawimawh a ni.
JuventusYouTube channel-ah chutiang mi chuan a chawlh hun tur sawichiang pahin, “Kum 12 chhung teh meuh he thuam ka inbel thei hi mumang a ang hial zawk.
“He thuam hi ka vun pahnihna ang mai a ni a, engkim ka tih apiang hi he shirt tan veka ti hi ka ni a; ka thinlungah hian he shirt hak hlimpui rengtu mipa naupang kha a la nung reng a, chu thinlung chuan he thuam nena khelmual luh hi a lungawipui a, duhthusam a taka lo chang a ni tlat,” a ti.
Season thar tawp ruala a Juve contract hmang zo ve tawh tur Bonucci hian kum 2005 khan Inter Milan-ah a career bul tanin, San Siro club chu kum 2005-06 khan a Serie A title hmasaber a lakpui nghe nghe.
He defender hian a club career-ah kum 2010-a Juventus a zawm hma khan Treviso, Pisa, Genoa leh Bari thuam inbelkual tawhin, Turin khaw tlarhnung khawng vanglai khan Juve backline-ah Andrea Barzagli, Giorgio Chiellini leh goalkeeper Gianluigi Buffon-te nen an dingho hman a, thangkhat lian zet chhung chu Juve thuam inbel chungin Italian football an thununho nghe nghe a nih kha!
Kum 2011-12 leh 2019-20 chhung khan Turin giants hian a zawn zatin Serie A title pakua tehreng an la tling a, kum 2017-18 season chhung AC Milan lama a pen zawk avangin khatih chhung khan Bonucci chuan title pariat chiah a lakpui thei!
March 2010 khan Bonucci hian Italy debut nghakchhuakin, kum li hnuah a vawikhatna atan Italy captain banhren a hreng zui nghal thei.
Azzurri tan World Cup vawihnih leh European Championship vawithum khel tlingin, Euro 2012-ah a ram chu runner-up a nihpui a, kum kua a ral leh hnu Euro final penalty shootout-ah England chu an buzawl Wembley ngeiah Italy-in an hneh kha a ni a, khami tuma Italy player pawimawh zingah Bonucci hi a tel leh.
Italian grest rualkhat Franco Baresi, Alessandro Nesta, Paolo Maldini leh Fabio Cannavaro-te khelhpui hman Bonucci chuan, “Nakuma inkhelh ka bansan hun chu Italian football ropuina leh lansarhna tlarhnung ven hun (defensive era) tawpna a ni tawh ang.
He tlarhnunga (Franco) Baresi, (Alessandro) Nesta, (Paolo) Maldini and (Fabio) Cannavaro-te nena kan tih ang kha thangthar defender-te hian an rawn chhunzawm ngei ka beisei a, anniho nena kan hnathawh kha ka chhuang a ni,” a ti.