Boruak dai deuh, Zofate’n ‘shutdown’ puang

Manipur-a Zo hnahthlakte leh Meitei inkar boruak a dai ta deuh a, Thawhlehni kha chuan inkah leh inbeih pawh a awm lo nia hriat a ni.
Thawhlehni, November ni 12 khan Manipur puma Zo hnahthlakte awmna hmun zawng zawngah ‘emergency shutdown’ an puang a, kar hmasaa Meitei kut tuara boral Zosangkim Hmar sun nana an tih niin, zing dar 5 atanga tlai dar 6 thlengin lirthei tlan loh tur, dawr hawn loh tur an ti.
Thawhtanni khan Churachandpur district leh Bisempur district inrina vel kawngpuiah shutdown hi an lo puang tawh a, ‘volunteer’-te zalen taka an kal theih nana tih a ni.
Kar hmasa Ningani-a Jiribam district-a Zairawn khuaa Zosangkimi thih hnuah an boruak a lum leh a, hmun hrang hrangah Zo hnahthlakte leh Meitei-te an inkap. Nasa taka an inkahnate pawh a awm a, silai puah zeuh zeuhna a awm bawk. Thawhlehni kha chuan inkah a awm ta lo tih thu dawn a ni.
Zairawn khua hi Zo hnahthlak ‘volunteer’-te’n an luah a, volunteer thenkhat, he khuaa luh belh, chuta tanga an camp pana Thawhtannia an kir leh lam chu CRPF te’n an lo kah avangin mi 10 vel an boral.
Manipur atanga thu dawn danin, CRPF te hian ralthuam dah turin an ti a, ralthuam lek lova an kal lai chu an kap ta a ni. Hliam tuar pawh an awm nual a, pakhat chu chu Thawhlehni khan Aizawl hruai thlen niin, damdawi inah enkawl a ni.
He thil thlengah hian Zo hnahthlakte rilru a na a, Meitei lam hian zalen taka CRPF leh India sipaite an kal pelh mai mai theih laiin, Zo hnahthlak volunteer-te chu ralthuam lek lova an kaltir laiin an kap tiin, hee thil thlen dan hi chhui chian an phut.
Tun hnaia an inkap hi, hmun thenkhatah chuan an inkap nasa khawp mai a, Meitei hel pawl pakhat Kangleipak Communist Party sipaite camp, Kangchuk khuaa mi pawh Zo hnahthlak volunteer-te’n kal chilhin, nasa takin an inkap tih thu dawn a ni.