Box office-ah Indiana Jones a No.1
Indiana Jones film thar ‘Indiana Jones and the Dial of Destiny’ chuan tun weekend kalta khan North America-ah cinema hall ticket hralhna atangin dollar maktaduai 60 a lalut a, box office No.1 a ni. He adventure-action film hian opening weekend sum lakluhah beisei a pha lo a, Indiana Jones film-ah Harrison Ford a chan tawpna tur a ni tawh a, a film pangana a ni tawh bawk.
He film James Mangold direct hian US pawnah dollar maktaduai 70 lalutin, tihian opening weekend-a khawvel huapa a lakluh chu dollar maktaduai 130 a tling. He film hi marketing tel miah lo pawhin dollar maktaduai 295 senna a ni a, chuvangin opening weekend-a a sum lakluh hi a beitham riau a ni.
Indiana Jones film hnuhnung ber chu 2008-a an tlangzarh Indiana Jones and the Kingdom of the Crystal Skull kha niin, he film hi Steven Spielberg direct a ni a, opening weekend-ah dollar maktaduai 100 chuang a lalut nghal thei a ni. Indiana Jones film dang ang bawkin Harrison Ford chu archeologist rorum tak lemah a chang leh a, tunah chuan Ford pawh kum 80 mi a lo ni ve tawh a, Phoebe Waller-Bridge, Antonio Banderas, John Rhys-Davies, Toby Jones, Boyd Holbrook, Ethann Isidore leh Mad Mikkelsen te nen an chang ho.
Spider-Man: Across the Spider-Verse-in dollar maktaduai 11.5 lalut lehin box office No.2 a la ni a, he film hian US-ah dollar maktaduai 339.9 lalut tling tawhin, US pawnah dollar maktaduai 267.4 lalut bawkin, a vaiin dollar maktaduai 607.3 a tlin der tawh.
‘Elemental’ pawhin dollar maktaduai 11.3 lalut lehin No.3 a la ni a, he film pawh hian US-ah dollar maktaduai 88.8 lalut tawhin, US pawnah dollar maktaduai 98 a lalut tawh bawk a, a vaiin dollar maktaduai 186.8 a tlin ve tawh bawk.
Jennifer Lawrence channa ‘No Hard Feelings’-in dollar maktaduai 7.5 lalut lehin No.4 a ni a, he film hian kar hnih chhungin US-ah dollar maktaduai 29.3 lalut tawhin, US pawna a lakluh nen chuan maktaduai 49.3 a tlin ve tawh bawk.
Transformers: Rise of the Beasts-in dollar maktaduai 7 lalut lehin No.5 a la ni pha a, he film pawh hian khawvel huapin dollar maktaduai 381 a lalut tling tawh bawk.
-- Advertisement --
Box office top 10:
1 Indiana Jones and the Dial of Destiny $60,000,000
2 Spider-Man: Across the Spider-Verse $11,500,000
3 Elemental $11,300,000
4 No Hard Feelings $7,500,000
5 Transformers: Rise of the Beasts $7,000,000
6 Ruby Gillman, Teenage Kraken $5,200,000
7 The Little Mermaid $5,150,000
8 The Flash $5,001,000
9 Asteroid City $3,800,000
10 Guardians of the Galaxy Vol 3 $1,800,000