Morgan Wallen ‘One Thing at a Time’ kar 15 a No.1 ta

Morgan Wallen ‘One Thing at a Time’ kar 15 a No.1 ta
Morgan Wallen album ‘One Thing at a Time’ chu Billboard 200 chart-ah a No.1 a, he chart-ah hian a zawn ni kher lovin kar 15 a No.1 tling ta. Hetihrual hian Young Thug, Peso Pluma leh Kelly Clarkson te pawh top 10-ah an debut. ‘One Thing at a Time’ hi 2011-2012-a Adele album ’21’ hnua he chart-a No.1 ni rei thei ber a la ni. Adele ’21’ kha chart-ah kar 24 chhung a No.1 thei a ni.
Billboard 200 chart hi kar khat chhunga US-a album hralh tam dan atanga tehin chart ranking siam a ni a, album hralh zat chhut nan hian album tak tak hralhna (traditional album sales) bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
One Thing at a Time hi kar khat chhungin US-ah 1,10,500 an hralh leh a, chung zinga 1,04,000 chu streaming atanga album hralhna tlukpui (on-demand official stream maktaduai 139.68) niin, album tak tak hralh chu 4,500 a ni a, album-a hla mal hralhna atangin 2,000 a tling thei bawk.
Young Thug album thar ‘Business Is Business’ chu 89,000 hralhin No.2-ah a debut a, chung zinga 80,000 chu streaming atanga album hralhna tlukpui (on-demand official stream maktaduai 106.32) niin, album tak tak hralh chu 8,500 a tling a, album-a hla mal hralhna atangin 500 a tling thei bawk. Young Thug hian he chart top 10-a lang thei album pariat a nei tling ta a ni.
Peso Pluma album tlangzarh hmasak ber ‘Genesis’ chu 73,000 hralhin No.3-ah a debut a, regional Mexican album-ah chuan he chart-a thleng sang ber a la ni a, regional Mexican album zingah he chart top 10-a lang thei pathumna a ni bawk. ‘Genesis’hralhna hi streaming atangin 72,000 (on-demand official stream maktaduai 101.18) a tling a, regional Mexican album tlangzarh tawhah stream nasat ber a la ni.
Chart No.1 hlui Taylor Swift ‘Midnights’ chu 57,000 hralh lehin No.4 a la ni a, Gunna ‘A Gift & A Curse’ chu 55,000 hralh lehin No.3 atangin No.5-ah a tawlh ve ta bawk.
Kelly Clarkson album thar ‘Chemistry’ chu 53,000 hralhin No.6-ah a debut a, Clarkson album he chart top 10-a lang thei pakuana a ni. ‘Chemistry’ hi Krismas album ni loah chuan Clarkson studio album 2017-a a tlangzarh ‘Meaning of Life’ hnua kan ngaihthlak leh theih hmasa bera ni.
Chart No.1 hlui vek album pathumin an indawt leh a, Morgan Wallen ‘Dangerous: The Double Album’ chu 47,000 hralh lehin No.6 atangin No.7-ah a tawlh a, SZA ‘SOS’ pawh 47,000 tling lo deuh hralh lehin No.5 atangin No.8-ah a tawlh a, Taylor Swift ‘Lover’ chu 43,000 hralh lehin No.10 atangin No.9-ah a insawn leh hret bawk.
Kar kalta chart No.2 ATEEZ ‘The World EP.2: OUtlaw’ chu 34,000 hralh lehin No.2 atangin No.10-ah a tawlh ve thung.