Boxing academy dinna tur sum pekchhuak tawh chin hre zui lo

Mizoram Boxing Association hnena boxing academy dinna tura sawrkarin sum a pekchhuah tawh chu a chin hriat zui a ni rih lo.
Thudawn danin, Mizoram Sports & Youth Services department chuan Mizoram Boxing Association (MIZBA) hnenah boxing academy dinna tur leh boxing atana hmanraw tul leina atan Rs.29,00,000 a sanction a. 2019 June 13 khan 1st instalment 80%, Rs. 23,20,000 pek niin, 2nd instalment Rs. 2,80,000 chu 2023 August 10 khan MIZBA president C Laltanpuina hnenah pek leh a ni.
Heti hian boxing academy atana sum pekchhuah tawh zat chu nuai 26 a ni a, vawiin thlengin boxing academy hi din puitlin a la ni lo tih sawi a ni.
Hemi chungchang RTI dan hmanga zawhna an dawn avangin Sports & Youth Services department hian 2024 May 10 khan insawifiah turin MIZBA hruaitute hi a koa, chhanna mumal tak an pe lo nia thu dawn a ni.
Department hotute chuan MIZBA hruaitute chu kumin May ra lhma ngeia boxing academy dinna tur cheng nuai 26 lakchhuah tawh an hmanralna, utilization certificate leh voucher thehlut turin a hriattir tih sawi a ni bawk.