SASCI sum lapse chungchang House-ah ngei sawi ang – MNF

Mizoram sawrkar hnuaia SASCI sum tih lapse chungchanga a mawhphurtu zawk nia inpuhna awm mekah ZPM Legislature Party-in common platform-a mipuiin TV-a an en theih tura inhnial an chonaah MNF Legislature Party chuan Assembly House-ah ngei session koha inhnial an duh tih an sawi.
Tarlan tawh angin, May 10 khan ZPM Legislature Party secretary TBC Lalvenchhunga chuan MNF Legislature Party secretary hnenah ziaka thlenin, tunhnaia SASCI sum chungchanga ralkhat atanga ‘press conference’ hmanga thu an inchuh avangin mipui an ti hrilhhai a, mipuiin thil nih phung dik tak an hriat theih nan media (TV) hmaah ‘common platform’ hmanga sawiho turin an sawm tih a hrilh. Sawmna hi an pawm a nih chuan an remchan hun hriattir turin an ngen tih a thlen bawk.
May 11 khan MNF Legislature Party (MLP) secretary Rohmingliana Ralte chuan ZPM Legislature Party secretary hnenah an chhanna lehkha hi amah ngeiin pe in, MLP chuan ram leh hnam tana thil/ thu pawimawh leh sawiho tur awmah, democracy ropuina leh legislator-te zahawmna vawnhim tul an ti a. Media kaltlanga common platform niloin, Legislative Assembly-ah ngei Special Assembbly Session koa, SASCI sum ti lapse-tu zawk sawiah an cho tih a hriattir a ni.
‘Sawrkarna chelhtu in nih angin, Special Assembbly Session koh pawh in thuneihna a ni a, May 2024 chhung ngeia he thu pawimawh hi sawiho kan chak hle a ni,’ MLP secretary hian a ti.