Brad Pitt leh Angelina Jolie te fanu Vivienne-i’n a hming atangin ‘Pitt’ paih a tum

Brad Pitt leh Angelina te fanu Vivienne chuan a pianchampha vawi 18-na a lawm zawh hnu lawkah a hming thlak dilin, a hming tawpa a pa hming ‘Pitt’ tih chu paih dilna Los Angeles Superior Court-ah a theh lut. Vivienne Marcheline Jolie-Pitt hian Vivienne Marcheline Jolie tia a hming thlak a dil a, a pa hming paih a duhna chhanah ‘personal’ tiin a tarlang.
Vivienne-i u, Siloh, kum 20 pawhin 2024 khan a kum 18 tlin champha a lawm hnu lawkah ‘Shiloh Jolie-Pitt” tih atangin ‘Pitt’ tih paih dilna court-ah thehlutin, court-in a hming thlak a lo phalsak tawh a, hetiang bawk hian Angelina Jolie leh Brad Pitt ten fa atana an lak Maddox, kum 24, leh Zahara, kum 21, te pawhin kumin kum tir lam khan an hming tawpa ‘Pitt’ tih paih dilna court-ah an lo theh lut ve tawh bawk.
Vivienne hi chuan court-a hetiang dilna a theh luh hma pawh hian a hming lannaah ‘Vivienne Jolie’ tih a lo hmang deuh zel tawh a, 2024-a a nu film siam The Outsiders a assistant-a a tan ve pawhin a hmingah hian ‘Pitt’ tih a telh tawh lo.
Angelina Jolie leh Brad Pitt te hian an inkawp laiin anmahni hrin fa pathum- Shiloh (20) leh phir Knox leh Vivienne (kum 18) te an neih bakah Cambodia atangin fa atan Maddox an la a, Vietnam atangin Pax leh Ethiopia atangin Zahara an la bawk.
Jolie leh Pitt te hi kum 10 vel zen zawh an inkawp hnuah August 2014 khan an innei a, kum hnih an inneih hnuah September 2016-ah inthen dilna Jolie-i’n court-ah a theh lut a, kum 8 vel zet an inthenna tur hi court-a an chai hnuah December 2024 khan an inthenna hi tihfel a ni ta a ni.