Brazil in bul an tan tha

Australia leh New Zealand-a khelh mek hmeichhe World Cup-ah champion tura rinkai zinga mi Brazil in bul an tan tha a, an khingpui Panama chu si li faiin an hneh. 4-0 a Panama an sawp tum hian Brazil forward Ary Borges chuan hattrick a siam. Hmeichhe World Cup khelh mekah hian a thlengtu pakhat zawk New Zealand chuan tha taka bul an tan hnuin an game hnihnaah an tlawhthlu a, Philppines an hneh lo ri ngawt. An khelh hmasak bera tlawm tawh Norway an chak zo lo nawn leh a, dinhmun chhe zual zawkah an ding.
Brazil 4-0 Panama
Hindmarsh Stadium, Adelaide, Australia-ah Brazil in World Cup a hmel thar Panama lakah tha takin bul an tan a. Chawlhlawk hma leh chawlhlawk hnu lamah goal hnih ve ve thunin, awlsam takin point thum an hmu.
Panama an hmachhawn tum hian minute 19-na lekah Ary Borges chuan hmahruaina goal a thun. Hma takah goal an thun vangin inrintawkna sang zawk nen an inlan a, game an thunun chhun-zawm zel. Goal hmahruai thuntu Borges hian minute 39-naah an goal hnihna a thun belh zui leh a, si hnih faia hmahruai chungin chawlhlawk an hmang.
Chawlhlawk hnu lamah Brazil an khel tha chhunzawm goal an thun leh thuai. Minute 48-naahBia Zaneratto chuan an goal thumna a thun a, an hmahruaina a tizau. Si thum faia hma an hruai hnuin goal hnih thun tawh Ary Borges chuan minute 70-naah an goal lina a thun zui leh a, World Cup a hmachhawn hmasak ber tumin Borges hian hattrick a siam nghal a. Hei tluka bul tanna tha a awm kher lo ang.
Group F a inkhel dangah France leh Jamaica te chu Pathianni khan goal awm lovin an lo inhnehtawk tawh. An elpui te chak an awm loh laia chak Brazil hi Group F-ah hmahruaitu an ni zui nghal.
Colombia 2-0 South Korea
Group H-ah Germany in an khingpui Morocco chu si ruk fai ngawtin an sawp tawh a. Colombia pawhin si hnih faia South Korea hnehin point thum an hmu ve bawk.
Colombia hian thawhtan tlai khan Sydney Football Stadium-ah South Korea an hmachhawn a, chawlhlawk hmaa goal hnih an thun hmangin hnehna an chang. South America team tan hian Catalina Usme chuan minute 30-naah penalty pet goal in hmahruaina goal a thun. Penalty atanga goal an thun hnu lawkah goal dang an thun belh zui leh thuai. Goal thun belh tuma Asia team na taka an nawr an chhawr tangkai thuai a, minute 39-naah Linda Caicedo chuan an goal hnihna a thun. Chawlhlawk hmaa goal hnih an thun bak chu goal dang an thun belh thei lo. South Korea pawhin an si phurh sut tum viau mah se goal an thun thei bik lova, tlawm zawkah an tang ta nge nge a ni.
Group H-ah hian Morocco sawptu Germany in hma an hruai a. South Korea hnehtu Colombia in an dawt a, Morocco leh South Korea in point an la hmu ve rih lo.
New Zealand an chak lo
World Cup thlengtu pakhat zawk New Zealand chuan Norway hnehin bul an tan a, phur viau mah se an khelh hnihnaah Philippines hneh lovin an tlawm ri ngawt a, an hma lam hun tur a chian loh phah.
New Zealand hian Wellington Regional Stadium-ah Philippines an mikhual a, World Cup hmel thar lakah hian hnehna chang theih ngei inring viau mah se bul an tan tha lo. Minute 24-na lekah Philippines tan Sarina Bolden goal thun chu hun tawp thlengin an sut thei lova, an mualah uiawm takin an tlawm zui ta a ni.