January ni 29, Pathianni zan khan FA Cup fourth round khelh chhunzawm a ni a. Brighton & Hove Albion chuan an mikhual Liverpool chu 2-1 a hnehin an hnawtchhuak. Liverpool hi FA Cup champion lai an ni a, FA Cup a champion ngun ber Arsenal ang thoin fourth round an paltlang zo lo. Pathianni zana inkhel dangah Stoke City chuan awlsam takin hnehna an chang ve thung.
-- Advertisement --
Liverpool an pul
Season kal mekah Liverpool an khel chhe tluang viau a, inelna hrang hrangah beisei an phak lo. FA Cup a champion lai Reds hi Premier League ah pakuana an ni mek a, European Competition khelh phak hram tumin tan an khawh. Carbao Cup leh EPL a an chethat loh hnuin FA Cup atangin hnawhchhuah an ni zui leh ta zel bawk a, Liverpool hian hun chhe tak an hmang mek. Hetihlai hian Brighton erawh chuan besei phak bakin an khel tha a, hma an sawn viau thung.
Season kal meka bul tan tha, Chelsea laka an manager Graham Potter an chan hnu pawha khel tha zui zel Brighton hi EPL ah parukna na ni mek thung. Season kal meka team tlo Brighton hian champion lai Liverpool lakah si phur hmasa zet mahse, 2-1 in khingpui hautak an lehthal a, hnehna pawimawh tak an chang.
Amex Stadium inkhelah hian Mikhual team Liverpool in bul an tan tha a, minute 30-naah Harvey Elliot chuan Mohamed Salah siamsak atangin hmahruaina goal a thun. Mimualah goal thun hmasa zawk an ni hian Jurgen Klopp-a team te phur viau mahse an phur rei lo viau thung. Minute 39-naah Lewis Dunk chuan Lamptey siamsak atangin goal a thun a, an si phurh a sut. Chawlhlawk hmain goal dang a luh belh theih tawh lova, 1-1 a inhnehtawk chungin chawlhlawk an hmang.
Chawlhlawk hnu lamah Brighton leh Liverpool hian chak zawk nih ngei tumin tan an khawh zui a, an khel pawh a hmuhnawm viau. Goal thun tumin an innawrtawn chhen mahse, goal a lut lawk thei lo. Hun pangngai tawp thlenga goal lut a awm belh theih loh vangin an inkhelh nawn leh ngei a ngaih hmel hman viau. Brighton hian Anfield a inkhelh nawn leh pumpelh hram tumin thapui an thawh zui a, hun tawp dawn tepah an hlawhtling ta nge nge. Minute 90+2 ah Kaoru Mitoma chuan goal pawimawh zet a thun a, Champion lai Liverpool lakah Brighton in hma an hruai let ta chiah bawk.
Liverpool hian an si phurh sut ngei tumin tan khawh zui chiam mahse hun a tlem tawh a, an khingpuiten an goal an veng deuh thup tawh bawk nen goal thun theihna hun tha an insiamchhuah thei lo. Tichuan, EPL ah si thum fai ngawta an hneh loh Brighton lakah 2-1 in an tlawm nawn leh a, FA Cup fifth round lut zo lovin an puanthuah an tel zui ta a ni.
Stoke an chak awlsam
Pathianni zana FA Cup inkhel dangah championship club Stoke City chuan League Two team Stevenage an mikhual a. Third round-ah Aston Villa hnehtu Stevenage hi 3-1 a hnehin fifth round an lut.
Stoke City hian an mualah bul an tan tha viau a, inkhel tan atanga minute thumna lekah Jacob Brown chuan hmahruaina goal a thun nghal. Hma takah goal thun mahse goal dang an thun belh har viau thung a, goal dang an thun belh hmain goal an chhuah hial nghe nghe. Minutet 70-naah Jamie Reid chuan goal thunin an si phurh a sut a. He goal hmangin hian inlehthalna lian thlentir nawn leh beiseina sang tak an nei hman. Stevenage an phur dawn chauh tihah Stoke in goal an thun leh thuai thung a, minute 73-naah Josh Laurent chuan hma an hruai nawn lehna goal a thun a. Minute 80-naah Lewis Baker chuan penalty atanga goal thunin, an chakna a nem nghet. Goal dang luh belh tawh lova inkhel tawp in, Stoke City chuan 3-1 in hnehna an chang a, fifth round an lut.
Pathianni zana inkhel hmuhnawm takah Wrexham leh an mikhual Sheffield United te chu si thum ve ve inpe in, an inhnehtawk.
Racecourse Ground a mikhual team Sheffield United hian bul an tan tha viau a, minute hnihna lekah McBurnie chuan hmahruaiana goal a thun nghal. Minute hnihna leka goal an chhuah hi mualneitu Wrexham hian minute 50-naa James Jones goal hmangin an si phurh an sut a. Minute 61-naah O’Connor goal thun hmangin an mikhual lakah non league team hian hma an hruai let ta hial. Hnu fual zawk an nih hnuin Sheffield United an insiamtha thuai a, minute 65-naah Oliver Norwood chuan goal thunin an si phurh a sut. 2-2 an inhnehtawk hnu lawk hian minute 71-naah Sheffield player Daniel Jebbison hnawhchhuah a ni. Hei hiam mualneitu beiseina nasa tak a siamsak a, minute 86-naah Mullin goal thun hmanga hma an hruai nawn leh hial bawk vangin inlehthalna lian thleng ngei tura ngaih a ni hman.
Tlawm mai tura ngaih ni hman tawh Sheffield United hian hun tawp rat thlengin tan an khawh a, an huaisen rah sengin minute 90+5-ah John Egan chuan an si phurh a sut ta nge nge a, non league club lakah mualpho an pumpelh a. Wrexham nen hian an inkhel dawn leh ang.