Brown University-ah zirlai pahnih kap hlum, a titu zawng mek

Brown University-ah zirlai pahnih kap hlum, a titu zawng mek
Providence, Rhode Island, US-a Brown University-a zirlai pahnih kap hluma mi dang pakua hliamtu chu zawn zui mek zel a la ni.
Inrinni tlai dar 04:00 (India-a Pathianni zing dar 02:30) vel khan classroom chhunga zirlaite an exam laiin silai hi mipain a hmet puak a ni.
US-a university upa leh hriat hlawh ber pakhata thil thleng avang hian khar nghal niin police-in a titu hi an zawng nghal a ni.
Silai a puah laia campus chhung hmun danga zirlai awmte chu hmun hima dah khawm an nih hnuah police-in an hruai chhuak tawh.
Rhode Island Hospital-a thuneitute chuan hliam tuarte hi ‘na tak tak awm mah se nunna atana hlauhawm an awm lo’ tih an sawi a. Thi leh hliamte hi tute nge an nih tih an sawi rih lo bawk.
“Vawiin hi kan khawtlanga thleng atana kan duh ngai loh thlen ni a ni a, tute pawhin na kan ti em em a ni,” tiin Brown University President Christina Paxson chuan a sawi.
Police chuan a kaptu chanchin kimchang lo tak an sawi chhuak tawh a, university nen hian inkungkaihna an nei em tih pawh an tar lang lo.
CCTV-a a lan dan chuan building hi kein a chhuahsan a, a hmel erawh a lang lo.
Providence Deputy Police Chief Tim O’Hara chuan a dum vekin a inthuam a, a hmai pawh a tuam nia an hriat thu a sawi a. Eng ang silai nge a hman tih pawh an la hre lo.
“Kan man theihna tura tul ang zawng zawng kan dah,” a ti a, police pawh a zawng turin tam zawk an inruahman tih a sawi.
Inkahna hi Brown University-a engineering school-a Barus & Holley building-a thleng niin chhawng khatnaa classroom lian tak a ni.
Economics professor chuan a course a ennawnpui lai tak niin a thachhangdawltuin zirlaite a hrilh fiah lai a nih thu Ocean State Radio hnenah a sawi a. “Kawngkaah a lo lut a, a au va, eng ber nga a sawi pawh ka hre lo, silai a hmet puak zui a ni,” tiin Rachel Friedberg-i hian a sawi.
Thuneituten Inrinni chawhnuah a building hi an dap vek a, rinhlelh leh ralthuam engmah hmuh an nei lo.
Brown University huam chhunga chengte chu a him tawk tih a chian hma chu pawn chhuak lo turin an ti.
Mi kahna a thlen hnu lawkah khan a kaptu hi man nia sawi a awm a; mahse, mi man hi he inkahnaah a tel ve lo tih sawi zui a ni.
Inrinnia university exam turte chu thulh nghal vek a ni tih provost Frank Doyle-a’n a sawi.
Brown University hi US-a zirna in sang hlun leh tha ber pakhat niin an ram hmarchhaka university tha zual awm khawm, Ivy League-a tel a ni.
Boston atanga km 80 vel leh New York City atanga km 290 vela hla, Providence, Rhode Island-a awm niin zirlai 11,000 chuang an awm.
Tun tuma thil thleng hi US-a kumina zirna ina inpawng kahna a thlen vawi 389-na a ni tih Gun Violence Archive (GVA) chuan a tar lang a. Inpawng kahna tia an sawi hi a titu tel lova mi pali leh a aia tam thi emaw, hliam emaw an awmna a ni.