Bruno Mars-a’n No.1 album pahnih a nei ta

On Mar 10, 2026 41 0

Bruno Mars-a’n No.1 album pahnih a nei ta
Bruno Mars album thar ‘The Romantic’ chu Billboard 200 (US albums) chart No.1-ah a debut a, he chart-a No.1 kai thei album pahnih a neihna a ni. Hetihrual hian Gorillaz, BLACKPINK leh Mitski te pawh top 10-ah an debut.
Bruno Mars hian kum 10 chuang hnua No.1 album a neih lehna hmasa ber a ni a, March 2013 khan a album ‘Unorthodox Jukebox’ chu Billboard 200-ah No.1 kaiin, he chart-a a No.1 vawi khatna a ni. He album hi No.1-a debut ni lovin, an tlangzarh atanga thla thum dawn hnuah No.1 hi a kai chauh a ni. ‘The Romantic’ hi chart ranking-a a lan theihna hmasa bera No.1 ni nghalin, he chart-a No.1-a Bruno Mars a debut vawi khatna a ni.
Mars hian chart top 10-a lang thei album panga a nei tling ta a, Anderson .Paak nena an thawh dunna ‘An Evening With Silk Sonic’ chu 2021 khan No.2 a kai a, 24K Magic chu 2016 khan No.2 a kai a, 2013-ah Unorthodox Jukebox No.1 kaipuiin, 2010-ah Doo-Wops & Hololigan album chu No.2 a lo kai tawh bawk. Heng album panga zinga pahnih chu No.1 kaiin, pathum chu No.2 an kai a ni.
Billboard 200 (US albums) chart hi kar khat chhunga US-a album lar dan tehna niin, chart ranking siam nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Bruno Mars ‘The Romantic’ hi kar khat chhungin 1,86,000 an hralh thei a, chung zinga 93,500 chu album tak tak hralhna nuin, 90,500 chu streaming (on-demand official stream maktaduai 93.95) niin, album-a hla a mala hralhna atangin 2,000 a tling thei bawk.
He album atanga a lead single “I Just Might” chu Billboard Hot 100 (US singles) chart-ah No.1 kaiin, he chart-a a hla No.1 kai thei 10-na a lo ni tawh bawk.
Bruno Mars “The Romantic” hi chart ranking-ah No.1 album hlui pathumin dawtin, Bad Bunny ‘DeBÍ TiRAR MáS FOToS’ chu 77,000 hralh lehin No.2-ah bawk a la awm a, Morgan Wallen “I’m the Problem” chu 75,000 hralh lehin No.5 atangin No.3 a kai thar leh ta a, Don Toliver “OCTANE” chu 66,000 hralh lehin No.6 atangin No.4 a kai thar leh ta bawk. Top 5 khartu chu Olivia Dean ‘The Art of Loving’ niin, 60,000 hralh lehin No.7 atangin No.5 a kai thar ve leh ta bawk.
Kar kalta No.1 Megan Moroney “Cloud 9” chu 55,000 hralh lehin No.6-a a tawlh ve thung.
Gorillaz album thar ‘The Mountain’ chu 53,000 hralhin No.7-ah a debut a, chart top 10-a lang thei album paruk an neihna a ni a, Cracker Island (No. 3, 2023), The Now Now (No. 4, 2018), Humanz (No. 2, 2017), Plastic Beach (No. 2, 2010) leh Demon Days (No. 6, 2005) te top 10-ah an lo lanpui tawh bawk.
K-Pop girl group, tunlai rimawi khawvela hmeichhe group lar bera chhal ngam BLACKPINK album thar ‘DEADLINE’ chu 52,000 hralhin No.8-ah a debut a, he chart top 10-a lang thei album pathum an neihna a ni. BLACKPINK ian 2022 kan an album ‘BORN PINK’ chu No.1 kaipuiin chumi hnuah group member- Jennie, Jisoo, Lisa leh Rosé ten solo album project an nei theuh a, tuna kum 4 chhunga an group album thar hmasa ber tichhuak lehin, top 10-ah an debut leh ta a ni.
Chart No.1 hlui Taylor Swift ‘The Life of a Showgirl’ chu 43,000 hralh lehin No.9-a bawk a la awm.
Chart top 10 khartu chu Mitski ‘Nothing’s About To Happen to Me’ niin, 43,000 hralhin No.10-ah a debut a, he chart top 10-a lang thei album pahnih a neihna niin, 2022 khan ‘Laurel Hell’ chu No.5 a lo kaipui tawh bawk.