BSF-in raltlan an dan loh thuai ka beisei: K Vena

On Feb 2, 2023 31 0

Bangladesh-a Chittagong Hill Tracts-a Zofa,
Mizorama tlanchhiat tumte BSF-in an lo dang Thin a, hei vang hian harsatna an tawk mek. Rajya Sabha MP K Vanlalvena chuan BSF te hian raltlan hi an dan loh thuai a beisei thu a sawi.
“BSF te hian an dan loh thuai a beiseiawm a, tunah pawh zawi zawi chuan an inthlahdulah ka ngai,” tiin The Aizawl Post a hrilh.

BSF te hian amahni ruaitu ministry of home affairs thu zawmin raltlante hi an lo dang tih a sawi a, ram dang aTanga rawn luh tumte lo dan chu an hna a nih thu a sawi bawk. Chutih rual chuan raltlan an ni a, kan unaute an ni a, hetia lo dan hi a dik lo tiin ministry of home affairs hotute leh BSF hotute a biak thu a sawi a, chu chu an hnial lo tih a sawi bawk.

Home minister Amit Shah hnenah lehkha a thehlut tawh a, home minister hian a lehkha a hmuh thu a hrilh tawh tih te sawiin, ThawhTanni-a party hrang hrang hruaitute Thutkhawmah pawh a sawi a, awm an tihpui tih te a sawi bawk.

“Kan unaute an ni a, kan hnampui an ni a, manganga an awm laia lo puih loh hi kan thei lo tih hi ka sawi ber chu a ni a, chu chu awm min tihpui,” a ti.

Raltlante lo puitu Bangladesh Refugee Relief Committee, Mizoram hruaitute chuan Mizoramah mi 475 an raltlan tawh tih an sawi a, BSF-in an dan avangin an rawn lut tam thei lo zawk tih an sawi bawk.

Chittagong Hill Tracts-a Zo hnahthlakte hi Mizorama an tlanchhiat theih loh avangin Rangamati, Chittagong, Dhaka leh khawpui dangahte an tlanchhe nasa nia hriat a ni a, Mizorama lut aiin khawpuia lama tlanchhia hi an tam zawk tih thu dawn a ni.