Ran hriselna enkawlna, veterinary service changtlung zawk ranvulhtuten an kawtkaia an dawn theihna’na hmalakna thar – Mobile Veterinary Unit 26 chu Nilaini khan chief minister Zoramthanga’n CVSc&AH Playground Selesih atangin a vailiam.
-- Advertisement --
Mobile Veterinary Unit (MVU) hi Livestock Health and Disease Control Scheme hnuaia programme – Establishment and Strengthening of Veterinary Hospitals and Dispensarieshnuaia dilchhuah niin, MVU man hi central sector component a ni a, a vai (100%) in sawrkar laipui tum a ni. MVU pakhat hi Rs 16,00,000 a ni a, 2021- 2022 khan Rs. 4,16,00,000 pekchhuah a ni. A enkawl zuina (operational cost) hi CSS component niin, staff hlawh, oil man, damdawi man leh adt hi state- in 10%, a bak 90% sawrkar laipui tum a ni. Hnathawktu tur veterinary doctor 26 leh paravet 26 lakfel an ni tawh a, manpower outsourcing agency ah driver hna pek a ni thung.
Chief minister chuan ram economy atana pawimawh tak – sa, bawnghnute leh thildang kan hmuhna hnar ranvulhte leh, thenkhat tan chuan chhungkaw member ang hiala kan en kan ina ranvulhte hriselna chu ngaihpawimawh ngai a ni, tiin, mihring hriselna ang bawkin ran vulhte hriselna leh enkawl kawngah hmasawn zel a tul tih a sawi a ni.
MVU hi scheme guidelines-in ran nuai khat tan MVU pakhat zel dil theih a nih avangin Mizoram chu MVU pathum emaw pali emaw bak dawng thei lo tur a nih laiin, tlangram inkalpawh harsatna hmun a nih avangin RD Block tina pek turin dilna siam a ni a. Mizoram dinhmun hrethiamin sawrkar laipui pawhin RD Block tina dah turin khatih hunlaia an dil zat MVU 26 a pe a ni. MVU atana lirthei hman Force Skylar vehicle hi pakhat Rs 15,70,912 man a ni a, registration leh branding atan Rs. 29088 hman a ni.
MVU hi Block huamchhunga ranvulhtuten an hman tangkai theih dan ber tur ngaihtuahin hmun remchangah dah a ni anga, Directorate a Call Centre nen thlunzawm a ni ang.