Buaina nasa zawk thleng ang : Trump

US President elect Donald Trump chuan January 20 a US President atana lakluh a nih hmaa Hamas tena mitang an hren te an chhuah zalen lo a nih chuan buaina nasa zawk a thleng dawn tiin a sawi.
“Mitang te chhuah zalen an ni lo a nih chuan buaina nasa zawk ahtleng a. Inremna a awm theih nana inhmalakna te tihbuai ka duh lo. Mahse, office ka luah hmaa mitang te chhuah zalen an nih loh chuan Middle East ah buaina nasa zawk a thleng ang” tiin Trump chuan a sawi.
He thu hi American hostage chhuah zalen a nih theih nana Hamas te nena inbiakna chungchang an zawhnaa a chhanna a ni a. Trump special envoy Steven Charles Witkoff chuan mitang te chhuah theih lek lek dinhmunah an ding mek tawh tiin a sawi thung a.
“Kan tihlawhtling thei dawn tawhin ka hria a. Eng vanga la tihlawhlting thei lo nge kan nih erawh sawi ka duh lo va. Mahse, President in a sawi leh a beisei te chiang taka a lantir avangin chu chuan inbiakna a tichak a ni” tiin Witkoff chuan a sawi.
Hmasawnna nasa tak an nei tia sawiin Witkoff chuan, “Doha khapwuia inbiaknaah hmasawnna nasa tak a awm mek a. Naktukah Doha panin ka kal leh nghal dawn a, a bak chu sawi mai remchang a awm lo. Hmasawnna nasa tak a awmin ka hria a, President lakluh hma ngeiin thil duhawm tak a awm theih ngei ka beisei” tiin a sawi bawk.
“Nasa takin kan thawk a. Mahse, president hmingthatna te a thusawi te chuan inbiakna a tichak em em a ni. Hlawhtling taka thil awmin nunna kan chhan theih ngei pawh ka beisei” tiin Witkoff chuan a sawi.
Trump chuan January 20 hma ngeia Hamas te chu an mitang kawl te chhuah turin a ngen a, “Hamas te tan thil duhawm a ni dawn lo, a nihna takah chuan mitin tan thil duhawm a ni dawn lo. Nasa zawk buaina a thleng ang a. Chubak chu sawi tur ka nei tawh lo. Hun reitak kaltaah khan mitang te chhuah zalen tawh zawk tur an ni a, mitang angin an hreng lo hrim hrim tur zawk a ni. October 7(2022) in runna kha a thleng lo hrim hrim tur zawk a ni a. Mite hian an theihnghilh leh der tawh zawk a, mi tam tak thahin an awm a nih kha” tiin a sawi bawk.
“Israel leh hmun dangin min bia a, chhuah zalen an nih theih nan hmala turin min ngen a, US mi leh sa te pawh an awm a ni. US mi leh sa te an hreng bawk a, nu leh pa an fa te chhuah zalen an nih theih nana mittui nena min ngen te an awm a, an fanu te chhuah zalen an beisei a ni” tiin a Donald Trump chuan a sawi bawk.