Nato secretary-general Mark Rutte chuan member tam te chu ‘indo rilru pu’ tura ngenin hei vang hian military lama sum sen tipung turin a ngen.
A hma lawkin US President atana thlan Donald Trump chuan Nato ram te chu national income atangin defence lamah 4% tipung vek turin a lo ngen tawh bawk.
Nato military exercisde lian tham tak chu January thla laihawl atangin Eastern Europe ah neih a ni dawn bawk a, hei hi helai region a Russia inlalian zel tur dan tumna a ni.
-- Advertisement --
Eng nge Nato, eng vanga din nge a nih?
Nato hi North Atlantic Treaty Organization tih niin Washington DC ah kum 1949 khan ram 12 lai – Belgium, Canada, Denmark, France, Iceland, Italy, Luxembourg, Netherlands, Norway, Portugal, UK leh US tena an din a ni.
Nato thiltum ber chu Russia pawh telna communist republic inzawmkhawm Soviet Union in Europe a huang a zauh zel tur dan a ni.
Nato member te chuan an zinga eng ram pawhin beih a tawk a nih chuan puih tur tih a ni bur bawk a.
Nato hian a hranpa in sipai a nei lo va, mahse, member ram te chuan sipai leh ralthuam thawhkhawmin hma an la thei thung a ni.
Entir nan, kum 1992 leh 2004 khan Yugoslavia ram ni thina indona thlenah khan UN thlawpin a inhnamhnawih a. Hei bakah hian military plans te siamin joint military exercise an nei thin bawk.
Eng ram te nge Nato member ni mek?
Nato hian Europe leh North America ah member ram 32 a bnei a – A tira original member 12 bakah kum 1949 atang khan ram 20 in an zawm belh tawh a ni.
Kum 1991 a Soviet Union tlukchhiat khan Eastern European ram tam tak Albania, Bulgaria, hungary, Poland, Czech Republic, Slovakia, Romania, Lithuania, Latvia leh Estonia te chuan an zawm tawh a.
Russia nena ramri 1,340km laia thui nei Finland pawhin April 2023 khan Nato zawm tawhin March 2024 khan Sweden pawh member ram atana lakluh a ni tawh bawk.
Heng ram pahnih te hian May 2022 a Russia in Ukraine a run hnuah Nato member nih an dil a, tun hma zawng chuan neutral ram tia hriat thin an ni.
Eng vangin nge Ukraine Nato member a nih loh?
Russia chuan Ukraine in Nato member nih a tumna chu a remti lo bur a, a chhan ber pawh a ramri ah Nato forces te an inbun theih dawn vang a ni. Mahse, kum 2008 daih tawh khan Nato chuan a duh chuan Ukraine in a zawm theih thu an lo sawi tawh thung.
Russia in a tun hnuah Ukrainian President Volodymyr Zelensky chuan Nato member nih an dilna chu a chak thei ang bera kalpui turin a ngen a. Mahe, Nato chief Jens Stoltenberg chuan Ukraine chu member nakinah chuan a la ni thei dawn tia sawiin mahse indona tawp hnuah chauh a ti thung.
Nato ram tena defence a sum an sen zat?
Nato chuan an member ram tinte chu an national income GDP atanga 2% tal defence atana hmang turin a ti a. Kum 2024 khan Nato ram zingah 23 te chuan he target hi an tihlawhtling thei tia sawi a ni.
Nato ram zinga GDP atanga defence lama sum seng hnem ber chu US leh Russia hnaiha awm ram Poland leh Baltic states te ho an ni bawk. July 2024 khan UK prime Minister Sir Keir Starmer chuan UK chuan defence sum sen GDP atangin 2.5% a hmang tawh dawn tiin a sawi bawk.
December 2024 khan Nato secretary general Rutte chuan member ram te chuan indona rilru pu chungin defence atana sumsen 2% aia tam an hmang tur a ni tiin a sawi a.
US President a nih term hmasah khan Trump chuan Nato member ram te chu defence lama sumsen tipung turin a lo ti tawh bawk a. Kum 2018 khan Nato member ram tin te chuan GDP atangin 4% tal defence atan an seng tur a ni a lo titawh a ni.
President term hnihna a chelh theih nana campaign a neihnaah pawh Trump chuan Nato member ram defence lama sum seng tam duh lo te chu Russia in a bei a nih pawhin an chhan lo mai thei tiin a lo hial a ni.
Nato in Ukraine a puih dan?
Nato chuan Russia in Ukraine a run chu Nato allies security tana hlauhthawnawm ber leh pawi thei ber tiin an sawi a.
Ukraine ah sipai a tirlut lo va, Russia nena inbeihna nasa zawk a chhuah hlauhna avangin no-fly zone pawh a siam hek lo. Mahse, Nato member ram hrang hrang te chuan Ukraine hnenah an duhthlanna in ralthuam an pe chur chur thung.
February 2022 leh October 2024 chhung khan US chuan Ukraine hnenah hian military support 59.9 billion Euros a pe hman tiin German research organisation Kiel Institute te chuan an sawi a. Hetih chung vek hian European Nato member ram te chuan Ukraine hnenah 52.6 billion Euros an pe hman bawk.
US, UK, Germany leh Turkey te chuan anti-tank weapons, missile defence system Patriot, artillery gun, tank leh drones te Ukraine hnenah an pe bawk a.
US, UK leh France te chuan long-range missile Atacms leh Storm Shadow/Scalp te an pe bawk.
August 2024 khan Ukraine chuan Nato membe ram tena US siam F-16 fighter jet 60 an pek turah pahnih a dawng tawh nghe nghe a.
November 2024 atang khan US leh UK te chuan Ukraine in an missile pek te Russian territory beih nana an hman remtihna an pe bawk.
Engtiangin nge Nato in Russia lakah security a thuam that?
January leh February 2025 hian Nato forces te chuan military exercise Steadfast Dart 25 tih chu Bulgaria leh Romania ah an nei dawna UK army division kaihhruaina hnuaia neih a ni ang.
He hunah hian Russia in a beihthut a thlen pawha Nato alliance eastern border venhim dan tur nunchan an zir dawn a ni.
Kum 2023 khan Nato commander te chuan Russia in Artic, North Atlantic, Eastern Europe leh Mediterranean Sea region ah te a beihthuta beihlet dan tur ruahmanna kimchang an lo siam tawh bawk.
Europe a sipai an dah te pawh 40,000 atangin 300,000 ah an tipung bawk a, Russia ram ri hnaihah defence tichakin battlegroup pariat lawih an dah tawh bawk.