JC.Zoremi Hmar Joute
-- Advertisement --
Kum tluana kan nghahfâk krismas chu hmang zovin, kum thar hun duhawm tak kan lo chuang kâi ve leh ta reng mai; kan fel bik vang emaw, kan phù réng vang bik a ni lo va, malsawmtu zahngaihna liau liau a ni e. Nikum krismas leh kum thar hlim taka chhungkuaa hmang ho leh lawm ho, kumin kum thar lawm kim thei ta lo tam tak an awm a, rilruin a hre reng a, Pathian awmpuina duhawm tak changa kumin hlim taka hmang turin duhsakna ka hlan a, chhiartu zawng zawng te, kum thar chibai vek u le.
Krismas leh kum thar vuakvetah thlamuang tak leh him dama kan lawm theih nan sorkar chuan halpuah leh halmawi te, boruak tichhe thei chi leh silai lem, a mu kah chhuah theih chi te a khap a. Veng tinah tlangau auvin an puang âwl lo va. Mizote hi hnam inlungrual tak, thu awih thei tak kan ni thin a, thu han awih loh zeuh erawh kan ching ve deuh.
Thuawih hi a zira kan zir a ngai; keimahni tana tha lo na na na chu kan tih loh ngam ve a tul khawp mai. Kan naupan lai chuan krismas leh kumthar laiin âr in bula halpuah hal kha an phal lo thin a, âr an pùl duh an ti thin. Ar thih theihna khawp boruak chhia chu mihring pawh hian kan ngeih viauin a rinawm bik lo va, hal loh mai kha a damdawi chu a ni mai. Kumim kum thar erawh kum dang zawng aiin mipui ten dan kan zawm tha deuh niin a lang a, a lawmawm hle a ni.
Thu awih hrim hrim hi a lo tha: Halpuah leh halmawi chungchang kher lovah pawh, hringnun kan zin kawngah hian A tha lama thu awih hrim hrim hi a lo tha. Naupan lai ata tawh nu leh pa thu awih apiang an hmuingil zel ang hian, kan inrelbawlna kawng hrang hrangah pawh hian hotute leh thuneitute thu awih mai hi a lo tha. Naupang chumchiap mai nih lai hi chuan nu leh pa thu kan awih lo thei lo va, ‘tichuan awm rawh, chuti chuan awm suh’ an tih apiang zawm kha a ni mai a. Kan han tleirawl chho va mahniin duh dan hran kan han nei ve a, thil hre ve ta riau, a tha leh tha lo pawh thliar thiam ve ta riau anga kan inngaih hun lai tak kha nu leh pa thu awih hun, kan awih that duh si loh lai hun a ni a, a khirh thin khawp mai.
A chhia a chhiain kan han kâk ve tan a, min star-tu leh star te kan han nei ve a, nun uluk hun a ni e tiin nu leh pate pawhin min vêng ru rân a. Hmeichhia bikah, nu leh pain tih loh tur an tih te ti lui a, kan awm dan tura an duh dan zawm tha duh lo kha chu an râi pawng zel mai reng lah tak a, nu leh pa thu awih inchhir erawh kan awm lo. Pathian meuhin thu a tiam hnan chu nu leh pa thu awih, nu leh pa chawimawitute kha an ni tlat a, mal pawh hi a sawm deuh bik a tih loh theih loh a ni.
Pathianin kan chunga roreltu tura a dah leh ruat te, min kaihruai tura a ruatte thu awih hi damna a ni e. Kohhranah emaw, tlawmngai pawlah emaw, politics pawh ni se, kan chunga roreltute thu awih mai hi a lo tha. Hotute thu awih lo, hotute tlin lohna lai hre thei em em, sawisel a. rêl chiam chiam thin leh mahni aia midangte tha zawka ruat thei miah lo chu hotu ni tlâk an ni bik hauh lo a nia.
Kum lo thar hi kan tan thil tha tihna hun atan te, mi chanchin tha zawnga sawi hram hram kum atan te, social media lama awm dan mawi chhawm luh kum, midang tihnat loh kum atan te leh midang tana malsawmna thlensak kum atan te hmang thei ila a va duhawm em!
Chhiartute, kumin hi in tan kum tha, malsawm dawnna kum, a tha zawnga kum chhinchhiah tlâk lo ni theuh turin duhsakna ka hlan a che u.