BUDGET 2025-26: Chhiah lak dan tur tharin beng a verh

BUDGET 2025-26: Chhiah lak dan tur tharin beng a verh
Indian Prime Minister Narendra Modi-a sorkar chuan kum khat chhunga sum hmanna tura ruahman leh hmuhna tura beiseite chu Inrinni khan a pharh a, bengverh hlawh ber chu sum lak luh vantlang (middle class)-te chhiah chawi thin tihtawp a ni dawn a. Ram sum thanna atan lo neih leh thil siam chhuahna kawngah nasa lehzuala sum dah a ni dawn bawk.
Finance Minister Nirmala Sitharaman-i’n parliament inkhawma budget a pharhah hian kum khat chhunga Rs. nuai 12 leh a aia tam la lut chinten income tax an chawi a ngai tawh dawn lo va, a hmaa Rs. 7,00,000 la lut chinin an chawi ngai thin kha a ni.
Sum la lut tlem deuh zawkte tana income tax tihtawp a nih bakah hian hemi aia tam la lutten chhiah an pek tur pawh tihtlem a ni tel a. Khawvela economy lian ber pangana hian hetiang ruahmanna a neih chhan hi ram chhunga sum virvel a tam theih nan leh ram dang atanga thil lak luhna mante a danglam thut thut karah mahni ram chhunga nghehna a awm theih nan a ni.
“Tih dan phung thar hnuaiah hian mi vantlangten chhiah an chawi tlem sawt ang a, an kutah sum tam zawk a awm thei dawn a. Hei hi an in chhung khawsak tihchangkan nan te, sum khawl leh investment atan an hmang thei dawn a ni,” tiin Sitharaman-i chuan a sawi.
Chhiah lak dan tihdanglam hian kum khat chhungin India sum bawm chu Rs. vaibelchhe nuai khatin a tikâm dawn niin Reuters news agency chuan a tar lang.
Khawvela mihring cheng tam berna ram hian kum tharah hian kum li chhunga a than muan ber tum a tawng dawn nia chhut lawk a ni a. Hei hi khawpuia sumdawnna leh mi malin investment an tih a tlak hniam vang te a ni a, hei bakah hian ei leh in man nghat lo lutukin sum lak luh a nghawng nasa vang niin Reuters hian a tar lang bawk.
Sitharaman-i’n 2025-06 budget a pharah hian mi rethei, thalai, lo neitu leh hmeichhiate chawi kanna tur sum ruahman a ni bawk.
India-a mihring tluklehding 1.4 chengte kum khat sum thawh chhuah hi $2,700 chuang hret a ni a, heng zinga hmun thuma thena hmun khat hi middle class an ni.
Chhiah lak dan tihdanglam hian ‘sum hmangtute a tihkâng beisei a ni a, thil man sang avanga an buaina hmachhawn thei turin sum khawl an neih phah ang a, sum lak luh hniam zawkte an than phah thei dawn’ niin HDFC Bank-a economist, Sakshi Gupta chuan Reuters a hrilh.
Sum a lak luh tlahniam thin nena inbuk tawk turin sorkar chuan sum hmanna tura ruahman a tipung hret a, 2025-26 atan hian Rs. vaibelchhe nuai 11.21 dahin kum kal mekah hian Rs. vaibelchhe nuai 10.18 dah a ni thung.
A term thum nana prime minister ni mek, Modi-a hi middle class-ten an dinhmun chawikang turin an nawr nasa a, an than theih nan hna tam zawk siam turin an nawr nasa hle.
Sorkar hian lo neihna lama thar chhuah a pun theih nan ram pum huapa kalpui tur ruahmanna pawh a duang nual a, a bikin pulse leh cotton thar chhuah lamah tan lak a tum zual hle.
Sitharaman-i chuan he hmalakna hnuaiah hian lo neitu maktaduai 17 vel tuam tum a nih thu leh an hnena puihna sum an pek thin pawh $3,460 atangin $5,767-ah tihpun a ni tih a sawi.
Sorkar hian India-a ni tin inhlawhfate chu chhinchhiaha healthcare an neih theihna tur pawh a ruahman a. Sitharaman-i chuan sorkarin identity card a siamsak ang a, chumi hmang chuan an hamthatna hrang hrangte an dawn thei dawn tih a sawi.
India-a inhlawhfate hi kum 2030-ah chuan maktaduai 23 an tlin theih tawh a rinawm niin sorkar think tank, NITI Aayog chuan a tar lang bawk.
Sitharaman-i hian sumdawnna bul tantute puihna tur thar pawh sorkarin a duang tih a sawi a. Hemi hmang hian thawng dun emaw, mi mala bei emaw chu sum tam zawka puih an ni dawn tih a puang.