Meghalaya-in UCC hman ve tum lo

Meghalaya-in UCC hman ve tum tlo
Uttarakhand chu sawi hlawh tak, Uniform Civil Code (UCC) hmang hmasa ber state a nih dawn mek laiin Meghalaya Chief Minister Conrad Sangma chuan an hmang ve dawn lo tih a sawi.
UCC chu India rama nun dan leh tih dan phung inang lo tak leh tribal nunphung a awm avangin a taka hman leh kalpui chi a nih loh thu Sangma hian Ningani khan a sawi a ni.
Hetih rual hian ram leilung fate dikna chanvo humhalh chungin civil law-te chu her remin inang tlanga siam theih a nih a rinawm thu a sawi.
India-a a taka hmang hmasa ber tur, Uttarakhand chungchang pawh Sangma hian a sawi lang a, anni hian tribal chin dante chu an huam teltir danw lo va. India ram ang, hnam hrang leh tih dan hrang tamnaah chuan UCC chu tih chi a nih loh thu a sawi a ni.
Sangma-a’n hetiang a sawi hi UCC chungchanga inhnialna a awm mek lai a ni a, an thenawma Assam chuan Uttarakhand-in hma an hruaina chu zui a tum mek nia sawi lai a ni.
“UCC hi tuna a lan danah chuan engkim inang tlanga kalpui tur a nih hmel a, hetiang hi chu India-ah hian a theih loh a ni,” a ti.
“Tribal leh ram leilung fa hnam hrang hrang, tih dan leh nun dan phung danglam bik tak nei an awm a, a zavaia hmun khata chhun khawp chu a theih loh hmel a. Hnam hrang hrangte nun dan inang vek tura tih chu a dik pawh a dik lo,” a ti bawk.
Meghalaya chief minister chuan thil harsa a nihzia entirna pawh a sawi a, “Ram pum emaw, state khat bilah emaw nu thuneihna (matrilineal system) hi kalpui duh ta ila, Meghalaya chuan kan thlawp ang, keini chu kan nun dan sa a ni,” a ti a. Dan siam turah eng angin inang tlang tur leh eng kawngin nge tih azirin thil a kal thei tih a sawi.
“Keini tan chuan, kan state sorkar hi chuan chiang takin UCC hi chu kan tih tumah a awm lo. Kan tribal-te nun dan leh nihna hi kan zah a, an tih dan hi kan hum zel ang,” a ti.
Sangma hian a sorkar chuan UCC chu an thlawp dawn lo tih a lo sawi tawh thin bawk.
Kum hnih kal ta khan Meghalaya-a tribal council chuan an huam chhungah chuan UCC hman tumna a awm chuan an duh lo tih an lo sawi tawh.
Uttarakhand hian UCC hi mi mal kaihhnawih thil – inneihna, inthenna, thuneihna inhlanchhawnna leh inrochun thila ang khat leh lungruala an kal theih nan hman turin a ti a. Scheduled Tribe leh a bik taka danin a humhalh tih loh an state-a cheng zawng zawngte hman turin a ti.