Buhfai lei dan chungchang sawi fiah turin Lokayukta-in FCSCA department hrilh nawn

Buhfai lei dan leh a phurh dan chungchangah insawi fiah turin Lokayukta-in Food, Civil Supplies & Consumer Affairs (FCSCA) department an ti a, mahse hei hi department hian an chhan loh avangin Lokayukta hian thil awmzia sawi fiah turin an hrilh nawn.Lokayukta hian thil awmzia sawi turin FCSCA department hi an hriattir nawn a, September ni 21 thleng hun pek leh an ni.
FCSCA department-in buhfai an lei dan chungchangah Lokyukta hnena thu thlen an awm a, dan dik lovin buhfai lei a ni tih te, an leina te’n elpui an nei lo a, mi dang nena buk lova thlan tawp an ni tih te, buhfai lei danah hian corruption a awm tih te chu an sawi dan a ni.
Lokayukta hnena thu thlentu, chhui tura ngentu hi Citizen Alliance for Truth and Justice (CATAJ) te an ni a, Lokayukta hian chhuiin thil awmzia sawi turin FCSCA department hi hriattir mah se FCSCA department hian Lokayukta hi an chhang lo a ni.
An lehkhaa a lan dan chuan, July ni 27 khan Lokayukta hian insawi fiah turin FCSCA department hi an hriattir tawh a, an insawi fiah loh avangin Lokayukta hian thil awmzia sawi fiah tura ti nawnin, September ni 21 thleng hun an pe ta a ni. Lehkha hi August ni 1-a mi a ni.
Buhfai lei danah thil dik lo a awm tia puhna chungchanga sawi fiah tur leh record awmte thehlut turin Lokayukta hian an ti a ni.
FCSCA department-in buhfai supply-tu tur an thlan danah thil dik lo a awm tiin, buhfai supply-tute’n Guwahati atanga Aizawla buhfai phurh nan two wheeler te. excavator (JCB) te an hmang a, lirthei pakhatin Guwahati atangin Aizawlah ni khatah buhfai vawi hnih a dah hman tih te sawiin Congress party-in April thlaah khan thuthar lakhawmtute an hrilh a, chu chu CATAJ hian bawhzuiin Lokayukta hi chhui turin an ngen tih thu dawn a ni.