Buhfai, oil leh gas dinhmun a tha

• ZPM

Buhfai, oil leh gas dinhmun a tha

• ZPM
  Tun dinhmunah mipui mamawh zual – buhfai, tuialhthei, eirawngbawlna gas dinhmun a tha rih hle tih ZPM party chuan an sawi.
  ZPM Media Department thuchhuak chuan, Zirtawpni khan Supply department office leh kudam thenkhat an tlawh a. Supply minister Pu B Lalchhanzova hoin Secretariat leh Directorate nen pheikhai rual takin mipuiin buhfai, gas leh tuialhthei an tlakchham lohnan theihtawp an chhuah a, buhfai chhekkhawl a tha a, thlaphanna tur a awm lo tih a sawi.
  August 1 thlenga buhfai chhekkhawl mek chu: Aizawl West DCSO – quintal 5778, Aizawl East – quintal 5721, Lunglei district – quintal 37641, Hnahthial district – quintal 4676, Champhai district – quintal 10321, Siaha district – quintal 10950, Lawngtlai district – quintal 22618, Kolasib district – quintal 18208, Mamit district – quintal 18346, Serchhip district – quintal 12949, Saitual district – quintal 10535, Khawzawl district – quintal 5414, Zuangtui Kudam – quintal 8540. A vaia FCS&CA kudam-a buhfai awm zat chu quintal 1,71,704 a ni.
  Kumin August thleng food security sem vek tawh a ni a; August hian non-food security ami, card var leh card sen tlemte chauh pek tur a awm tawh tih a sawi a. Open Market Sale Scheme atangin FCI dawr a ni a, August 1 khan release order dawn theih beisei niin, a remchan dan anga buhfai lakkhawm a ni a. December thla thleng daih tur Mizorama kudam tinah dah khawl vek a ni tawh tih a sawi.
  Kawng dinhmunin duhthu a sam lo chungin, tuialhthei phurtuten theihtawp an chhuah tih ZPM hian sawiin August 1 zing report-ah petrol leh diesel stock a tha a, free sale theih vek a nih bakah July 31 zan khan Kawnpui atanga Aizawl pana chho LPG phur 25, petrol phur 19, diesel phur 23, petrol leh diesel phurh pawlh 6 an awm a. July 26 – August 1 chhunga LPG trip 82 (bur 27548), diesel trip 163 (litre 2596000) leh petrol trip 163 a lo lut tih a sawi. Gas bik hi sem chhuah reng a nih avangin stock ang zawnga sawi vak theih a ni lo tih a sawi bawk.