16 September, 2022 a ni a, chhun chawlh hnua school a pan leh dawn ruaiah kum kua leka upa Zin Nwe Phyo chu a puin sandal thar diai a leisak chu a pek avangin a hlim ngang mai.
-- Advertisement --
A pu chu coffee a siam sak a, a pheikhawk thar chu bunin school a pan a, central Myanmar a Let Yet Knone khuaa cheng niin an school chu an in atanga 10 minutes kal lek a ni. Hemi hnu rei lo teah hian helicopter pahnih chuan khua chu hualin an kap zui ta a ni.
Zin Nwe Phyo leh a classmate te chuan school an thleng hman a, an zirtirtu te nena class an lak dawn chiahin aircraft a lo thlawk tia authawmin a tiphu zawk hlawm a.
Mahni inven nan leh sahim nan an tlandarh a, tanpuitu ngiatin an tap bawk a, rocket leh ammunition te chuan school chu a deng dawt dawt a.
“Tih tur reng kan hre lo” tiin zirtirtu pakhat chuan a sawi a, airstrike laiin classroom chhungah an awm thu a sawi a. “A tirah chuan helicopter ri reng kan hre lo va, silaimu leh bomb in school ground a den chu kan hriat a ni mai” a ti a.
“School building chhunga naupang te chu silaiin a deng fuh a, a then te chu pawnah an tlanchhuak a, inphenna an zawng a ni,” tiin zirtirtu pakhat chuan a sawi a. Ani erawh a class te nen tengtere kung lianpuiah an inphen tiin a sawi.
“School an pawngpaw kah a, naupangte an kap fuh a ni,” tiin mita hmutu pakhat chuan a sawi a. “Naupangin hliam an tuar a, bomb thlakna ground floor ah kaw lian tak a awm bawk,” tiin a sawi a.
Heng helicopter te hi Russia siam Mi-35 helicopter gunship niin ‘flying tanks’ emaw ‘crocodile’ tia sawi a ni bawk a. Ralthuam hlauhawm tak tak kengin chung zingah chuan rapid-fire cannon te, multiple rocket kapchhuak thei pods te keng telin building nghet ber ber pawh kap thlu thei khawpa chak a ni.
Myanmar sipai tena Aung San Suu Kyi sorkar an paihthlak hnuah Myanmar sipaite chuan air strike chu hmanrua pawimawh berah hmangin civil war awm mekah air force te aircraft 70 vel Russian leh Chinese siam neitute chu a sulsutu ber an ni.
Airstrike avanga naupang nunna chan zah hriat theih a ni lo va, ram pawn atangin Myanmar ram chhunga thil thleng dik tak hriat ngaihna a awm lo va, hei vang hian engtiang chiaha tawrhna nasa thleng nge tih finfiah theih a ni lo.
Helicopter atanga 30 minutes dawn beih a nih hnuah helicopter pahnih te chu tumin sipaite chuan silai hmetpuak reng chungin a la dama te chu leia thingthi turin an ti a. Anmahni en miah lo tura tiin an en chuan thah an nih nghal tur thu an hrilh bawk a, tichung chuan sipaite chuan khuaa opposition forces awm zat te an zawtfiah zui ta thin a ni.
School chhungah chuan naupang pathum ruang a let bal a, chung zinga pakhat chu Zin Nwe Phyo a ni a. Pakhat dang chu kum sariha upa Su Yati Hlaing niin amah leh a unaunu chu a piin a enkawl te an ni. An nu leh pate chu helai biala midangte ang bawkin Thailand a hnathawh tur zawnga kal an ni a. Naupang zingah an kut leh ke chhum te hliam tuar nasa taka tap vawng vawng te an awm bawk.
Spaite chuan plastic bin liner hmangin mihring taksa them te chu an chhar khawm a. Zirlai leh zirtirtu 12 hliam tuar te chu truck pahnihah phurin damdawi In hnaihna ber Ye-U khua an panpui a. Kalkawngah naupang pahnihin nunna an chan a, he khua pawnah hian sipaite chuan puitling paruk leh tleirawl pakhat chu an kaphlum zui bawk.
Myanmar hi civil war mikhual lohna ram a ni. Kum 1948-a independence a nih atangin Burmese armed forces te chuan a ram chhungah hel pawl hrang hrangte an bei reng a. Mahse, chung buaina te chu buaina saltiah mai niin indona pangngai satliah ang mai chauh a ni.
Kum 2012 khan Kachin state-ah air force tena Mi-35 gunship an neih hnuah sipaite chuan vansang atangin hel pawl te an bei tan ta a ni. Air strike chu neih uar zelin Shan leh Rakhine styate ah pawh buaina chinfel nan an hmang bawk a.
February 2021 khan Myanmar army te chu sipai sorkar duh lova intelkhawm People’s Defence Forces, or PDFs – volunteer militias tena road ambush te neia an beih tak fo avangin vansang lam atangin beih an uar ta a ni. Let Yet Kone a an chetdan ang chiah hian vansang atanga an beih hrep hnuah sipaite lut chauhin opposition forces te an vaihma ta thin a ni.
February 2021 leh January 2023 chhungin Myanmar sipai te chuan air strike tum 600 chuang an nei hman niin conflict-monitoring group Acled (Armed Conflict Location and Event Data Project) te data chuan a tarlang. Air strike hmang hian Myanmar sipaite chuan October 2021 leh September 2022 khan civilian 155 chuang an tihlum tawh niin sawi a ni bawk.
Resistance group-te chuan sipaite chhang let turin theihna an nei tlem hle a, an neih chhun chu consumer drone siam danglam mai niin chumi hmang chuan military vehicles leh guard post te an bei ve thei tawk a ni.
Let Yet Kone khua hi eng vanga sipai tena bei nge an nih a chiang thei lo. Mirethei te te chenna niin mi 3,000 vel chenna khua niin buh leh groundnut chingtute chenna khua a ni a.
Depayin district-a awm niin sipai sorkar duh lote tamna a ni thung a. Myanmar sipaite pawhin district dang zawng aia beihpui an thlak nasatna a ni.
Sipai sorkar thupuangtu chuan school beih a nih hnuah sipai te chuan khua lutin PDF leh KIA mi leh sa te an dap zui an ti a. Mahse, he school-ah hian hel pawl te an awm tih reng finfiah a ni lo. School hi Buddhist monastery a din leh kalpui a ni a. Zirlai 240 vel awmna a ni a, military rule duh lo tena school hi an kalpui a ni.
Myanmar sipai sorkar duhlohna lantirtu langsar zingah zirtirtu leh healthworker te chu langsar tak an ni a. Sorkar hnathawk te chuan sipai sorkar thawhpui an duh loh avangin tunah chuan school leh health centre tam tak te chu sorkar ni lovin community tena an enkawlin a awm mek bawk.
Let Yet Kone khua beihna hi khawvelin a dem chungin Myanmar sipaite chuan an chetlakna an chawl der chuang lo. Helicopter mai ni lovin indo thlawhna te nen hel pawl te awmna nia an ngaih te chu an bei chhunzawm zui zel a ni.
Thla kalta pawh khan Chin National Front insurgent te awmna India ramri hnaiha mi chu indo thlawhnain an bei bawk a. Hei mai bakah hian Karen State-a Biak In pahnih an bei bawk.
Myanmar-in vansang lama theihna a neih belhna chhan hi Russia leh China tena an thlawpna vang niin ram dang tena an hrek laiin heng ram pahnih te hi chu Myanmar puitu ber an la ni zel a ni.
Russia ngat phei chu Myanmar thian tha ber ni tawkin Mi-35 mai bakah Yak-130 ground attack jet te pawh pe tawhin hengte hi hel pawl te beih nana Myanmar-in rinrawla a neihte a ni a. China pawhin FTC-200 trainers, ground attack nana tha em em chu Myanmar hnenah a pe bawk.