BWF World Junior Championships Zuala ngam loh UAE shuttler Malhan
BWF World Junior Championships
Zuala ngam loh UAE shuttler Malhan
National Centre of Excellence, Guwahati-a BWF World Junior Championships 2025 khelh meka India tana inlan Mizo player pahnih zinga pakhat zawk H. Lalthazuala chuan singles first round a paltlang hnuah ngam loh a tawng zui ta tlat a, United Arab Emirates rawlthar kum 15 mi Riyan Malhan lakah 15-12, 15-6-in a tlawm tlat!
India hi badminton thiam ram zinga lang pha niin, tuntum Junior Worlds-ah pawh hian ram dang team zingah India chhulchhuak leh India nena inzawmna nei player engemawzat an awm a, chu’ng zinga pakhat chu Round of 32-a Zuala hneh loh Malhan hi a ni.
Dubai-a piang Riyan Malhan-a pa hi St. Stephen’s College, Delhi-a zir thin niin, Dubai khawpuia inbun Mashreq Bank-ah vice president a ni a, tah hian a fapa Malhan pawh hi piangin, UEA ai awhin India ramah BWF World Junior Championships a rawn khel ta a ni.
Malhan-a pu pawh St. Stephen’s College-a HOD Economics a ni nghe nghe.
Dubai Gem Private School-a zir mek Riyan hian junior circuit chu India a khel phawt a, mahse, an thlahtute thisen lo chhuahna ram aiin a pianna ram tana khelh a thlang ta rih zawk a ni.
Nikum khan Asian level-ah Riyan hian U-15 bronze medal hlawhchhuakin, Khaleej Times-in an kawmnaah UAE atanga Asian Junior Championships-a medal la thei hmasaber nbih chu phurawm leh lawmawm a tih thu a lo sawi tawh nghe nghe a ni.
Indian shuttler hmabak nei eng tak Zuala a hneh zui leh tak hial avangin 2026 Youth Olympics leh 2028 Summer Olympics khelh a tumna kawngah pawh UAE player hian beiseina a neihsan phah tih sawi chungin a nu leh pa chu India chhulchhuak ni mah se Dubai-a piang a nih ang ngeiin international event-a UAE ai a awh thei chu a inchhuang larh tih a tarlang tel.