Sawrkar puihna dawng turin Sikul awm tawh lo thlang tel

Tunhnaia sawrkarin adhoc grant in aid-a a hlankai school zingah tih tawp tawh school a tel tih Congress party chuan sawiin, thlan tel a nih chhan sawifiah turin thuneitute an phut.
MPCC Media department chairman Lalremtuata Renthlei sawi danin, tunhnaia cabinet thukhawmin dinhmun sang zawk – adhoc grant in aid-a a hlankai sikul 263 zingah sikul awm tawh lo (defunct), Zasai Memorial High School, Siaha a tel tih a sawi.
Zasai Memorial HS hi Siaha biala MNF MLA candidate tur Lalmalsawma Zasai pa hriatreng nana sikul din, kum tam kal tawha tihtawp tawh a nih thu leh a building pawh mimalin khawsak nan an luah deuh vek tawh a nih thu a sawi a. Mizoramah mimal, khawtlang leh kohhran sikul tamtakin sawrkar tanpuina an dawn ve theih loh laia sikul awm tawh lo sawrkar tanpuina dawng tura tih a ni chu mak an tih thu a sawi.
Sikul awm tawh lo tanpuina pek tura an tih chu paih leh nghal a, thil dik lo titute chhuichhuak a, danin a phut anga an phu tawk hremna pe turin sawrkar an phut tih a sawi a. Mizoram sawrkarin kumtin school tanpuina a pek thin Rs. 250000 chu Zasai Memorial HS hian a dawng thin reng em tih te, School Education department-in sikul awm tawh lo hi engtin nge a hriat loh tih leh, engvangin nge sawrkarin sikul awm tawh lo tanpuina a pek reng thin tih sawifiah turin an phut tih a sawi bawk.
Samagra hnuaia hnathawk tha tak, an post ngaia tha taka awmte dinhmun siamthat chungchang sawrkarin a ngaihtuah tawh em tih te chu an zawt bawk tih MPCC Media chairman hian a sawi a ni.