CADC-ah sawrkar a ding thei – Council of Ministers

Chakma Autonomous District Council-ah sawrkar ngelnghet tak a ding thei tih chu an ngaihdan a ni tih Council of Ministers chuan Mizoram larsap an hrilh.
Council of Ministers hi chief minister Lalduhoma kaihhruaiin Thawhlehni zan khan an thukhawm a. Chakma Autonomous District Council chungchanga Mizoram larsap-in Council of Ministers ngaihdan leh thurawn (advice) hriat a duh chungchang an sawiho.
CADC kal dan chhuichiangtu tur Inquiry Commission thar din tha an tih leh tih loh thuah an ngaihdan a zawhnaah Council of Ministers hian, CADC kalphung chhuichiangtu Inquiry Commission hi din a lo ni tawh a, an report pawh an thehlut tawh a. Chumi hnuah Autonomous District Council pathum kalphung zirchiangtu Study Team, chief secretary kaihhruaia din a ni leh a, an report an thehlut tawh a. Lawngtlai district bawrhsap pawhin CADC chungchang report a thehlut tawh bawk a. Heng report pathum hi an tha tawk a, a hranpaa Inquiry Commission din leh a tul tawh loah a ngai tih a sawi a ni.
Larsap hian CADC chu Governor’s Rule a dah chhunzawm zel tur chi a nih leh nih loh thua an ngaihdan a zawhnaah pawh Council of Ministers chuan, CADC-ah hian MDC member 20-a member 16 neia sawrkarna siam thei party an awm avang leh High Court-in sawrkarna siamtir dan kawng zawng tura thurawn a lo pek tawh angin, Governor’s Rule-a dah loa sawrkar siamtir turin ngenna a lo siam tawh a. Nimahse, Governor’s Rule-ah dah a ni ta tho a. Governor’s Rule term a zawh hnuah pawh sawrkarna siam thei party hian an dinhmun sawhsawn loa sawrkarna an la siam theih reng avangin Governor’s Rule-a thla 6 dang dah leh a tul chhan (political instability) engmah a awmin a hre loa. CADC-ah hian sawrkar ngelnghet tak a ding thei tih chu Council of Ministers ngaihdan a ni tih an thlen.