CADC CEM-in MLA nih a duh, dilpuitu an awm

Mizoram inthlanpui lo awm tura MNF party-in
harsatna an tawh mekna chu Tuichawng bial hi a ni awm e; he bialah hian ding tura ngaih pahnih an awm mek a, candidate nih inchuhna boruak a inmun mek.
Chakma Autonomous District Council (CADC) huam chhunga Tuichawng bialah hian DD Chakma chu MNF candidate ni tura ngaih a ni a, mahse chiang tluka ngaih a nih hnuah CADC-a an CEM RM Chakma hming a lang ve leh a ni.
RM Chakma hi MLA hlui a ni a, CEM pawh vawi hnih vawi thum a ni tawh. Tun hnaia CADC inthlanah MNF an sorkar a, ani hi CEM a ni leh a ni.
RM Chakma hi MLA candidate ni tura duhtu an awm a, an party hruaitute hnena dilpuitu an awm; “|hiante’n min dilpui a, MLA ni se min duh a,” amah pawhin a ti.
“|hiante’n candidate ni turin min duh a, an thu thu a ni a. Party hotute hnenah an sawi a,” a ti bawk.
Amah pawhin MLA nih a duh a, CEM nih aiin MLA nih a duh zawk tih a sawi a, CADC huam chhungah MNF tihngheh phawt a duh avangin CADC inthlanah pawh a ding nia sawiin, tunah chuan MNF hi a nghet tawh a, chuvangin MLA nih a duh niin a sawi.
Bial 20 awmna CADC-ah MNF hian bial 18-ah MDC an nei a, MDC 14-in MLA candidate ni turin an duh niin RM Chakma chuan a sawi.
Seat hi chang lo ta se engtin nge a kal ang tih chungchanga zawhna chu, an la ngaihtuah loh thuin a chhang a, “|hiante thu thu a ni a, concrete decision a awm lo,” a ti.
MLA-ah ding ta se a tlin a ring a, “Engah nge ka tlin loh ang?” tiin hemi chungchanga zawhna a chhang. “MNF a lian a, MDC 14-in min duh a,” a ti.