Campaign laia auhla kha kan thupui ala ni fan – K Sapdanga

MLA inthlan dawn campaign laia an au hla zing ami, rinawmna leh taimakna chu an thupui a la ni fan tih ZPM hruaitu, minister K Sapdanga chuan a sawi.
Sihphir Venghlun Village Council by election neih turah Inrinnia Sihphir Venghlun leh Nausel an tlawhnaah K Sapdanga chuan, Pathian zara hlawhtlinna an chan hi an tum ram kn thleng ta tihna a ni loa, an tum ram thleng turin bul an tan chiah tihna a ni tih sawiin, “Campaign laia kan auhla zing ami, rinawmna leh taimakna hi kan thupui a la ni fan a, ram kan vei ta sa sa, a tawp thlenga kan ram tana thawk turin kan rilru pawh kan siam thar zel a ngai. Mipuiin beiseina sang tak neiin kan kutah rorelna an dah a, Pathian chakna ring chung leh mipui thawhhona nen ram tan theihtawp kan chhuah zel dawn a ni,” a ti.
Aizawl East-I bialtu MLA, minister Lalthansanga pawhin an bial chu urban leh rural area awmkawpna a nih avangin hmasawnna a rual thei ang bera semrual a ngai tih a sawi a. Bial taima an ni a, chawhmeh leh thlaithar tharlam tak hmanga Aizawl khawpui chawmtu an ni, tiin, “Sawrkar pawhin hei hi hria in, ei leh bara kan intodelh theih nan leh kan thlai tharte mumal zawka kan tih ral theih nan Agriculture Produce Wholesale Market pawh kan siam dawn a, kan huan leh lo te awlsam zawka kan kal theih nan lirthei kal theihna turin hma lak mek a ni,” a ti.