Canada ramah Antonelli a chak leh tawh!

A zawna Formula One race vawi li a chak berna ni turin Pathianni khan Mercedes driver Andrea Kimi Antonelli chuan Canadian Grand Prix-ah hnehna chang lehin, drivers’ championship standing lamah pawh point 43 zetin hma a hruai fal ta.
Vawi khat chak ve tawh George Russell chu Canada tlankawngah hian a tawp thleng zo loin a hmahruaina a tawpsan a, title beiseina pawh a tlakhniam phahin, driver standing-ah pahnihna la luah chhunzawm bawk mah se a team-mate leh hmahruaitu ni bawk Antonelli nena an inthlauhna hi a sang ta viau mai.
Mercedes driver pahnih hi Pathianni race-ah hmahruaitu nih inchuhin an inlehpel tawn zak zak a, lap 30-naa Russell-a car a tlan chhunzawm theih tak loh hma zawng kha chuan an insi deuh reng a tih theih a, a tawpah Italian driver zawk a dingchang leh ta nge nge a ni.
Rus sell-a chawlh chhan kha Mercedes lam chuan ‘power-unit problem’ niin an sawi.
Mercedes driver pahnih hi championship hmahruaitu nih inchuh satliah mai an ni lo a, tlankawnga an inbeihna mai piahlam thlengin indona hian hlet a chhuah a; Inrinni sprint race ata tawh thu inchuh an nei a; Antonelli chuan a Briton team-mate Russell-a car khalh dan chu Pathianniah pawh sawisel lehin, tlankawng a zawh sual theihna hawi zawngin a nawr Thin niin a puh!
Russell-a race tawp hma lawk khan driver pahnihte hian an team aTangin mawihnai zawka inum tura zilhhauna an dawng a, a nih loh chuan team order (hold position) an dawn mai theih thua vaukhan niin, hold station an tih bawk hi puankhum an nih chuan team pakhat driver pahnihte hi an tlanna ngaia tlan reng tur leh inlehpel thei lo tura tihna order a ni.
He team order (tactic) an tihchhuah Thin chhan chu team khat car pahnih insut palh venna atan te, tire leh engine vawnhimna bakah championship point hloh Then theihna laka invenna a ni.
Russell a tlan chhunzawm theih tak loh hnu khan champion ropui pahnih Lewis Hamilton leh Max Verstappen tan pahnihna inchuh boruak a lian zui nghal hluai a, race tawp hnaih lamah Ferrari driver Hamilton khan Red Bull car khalhtu Verstappen hmakhalhin pahnihna dinhmun a luah a, Dutchman zawk pawhin lawmman semna dawhsan hniamber a chang zui ta tho a ni.
Canadian Grand Prix-ah khan Russell leh Antonelli inkara title fight kal nat dan kan hmu thei a; a tir lama tyre strategy an chheh sual tuara McLaren zuzi dan hmuh tur awm bawkin, kumin chhunga Red Bull chhuanvawr Verstappen-a podium hmasaber kan thlirliam bawk.
North America lama intlansiak vawi hnih a awm zawn hnuin chawlhkar hnih hnuah Formula 1 chu Europe-ah a kirleh dawn a, June ni 5-7 chhung hian Monte Carlo-ah iconic Monaco Grand Prix thlir tur a awm zui leh dawn a ni.