Cancer pumpelh theih dan

Cancer pumpelh theih dan
Tun tum chu cancer pumpelh theih dan emaw, cancer risk tihhniam theih dan lam kan sawi ve leh thung dawn e. Cancer risk tihniam tura tih tur leh tih loh tur te kan inhrilhin kan inzirtir nasa hle a, chuvangin he natna hi kan tihkhai phah a. Chumi piah lamah, a risk tihhniam dan tur ni a mithiam te sawi kan zawm tha viau chung pawha kan la cancer thei tho si te hi he natna ti tihbaiawm lehzualtu a ni.
Tun tumah hian Times Of India health section-in cancer risk tihhniam theih dan ni a a sawi te kan rawn tarlang dawn a, heng te hi tha taka i zawm a nih chuan i cancer theihna risk chu i tihniam ngei ang. Theihnghilh loh tur chu, doctor-in test chi hrang hrang nei tura min chawh te hi tih zel a tha, entir nan, colonoscopy ang chi te phei hi chu cancer tur hriatchhuah hma leh ven nan a tha hle a ni.
1. Vaihlo leh a kaihhnawih atanga siam thil chi hrang hrang te sim rawh. Mei zuk hian chuap cancer a thlen thei tih kan hre lar hle a, chutiang bawkin- chawkawng, aw bawm, ka chhung, hrawk, kal, phing, pum leh hmeichhe chhul kawngka cancer te pawh a thlen thei. A zuka zuk ni lo, a ei emaw hmuam emaw chi, vaihlo atanga siam dang te pawhin cancer risk an tisang tho tih hriat tur. Meizuk hi ven theih reng ni si, a hun hmaa thihna thlentu langsar ber a ni a, mi meizuk khu hip luh vang pawhin cancer risk a sang ve tho bawk.
Zuk leh hmuam timi i nih chuan sim hlauh la, tichuan i cancer theihna risk i tihniam a ni mai. Sim turin tlai luat a awm lo.
2. Mi thau uchuak te hian colorectal cancer an neih theihna risk a sang bik a, chutiang bawkin esophageal adenocarcinoma, gallbladder, thin, thisen, multiple myeloma leh non-Hodgkin’s lymphoma risk te pawh a tisang. Hmeichhe thihul tawh, thau uchuak bawk si te phei chuan hnute leh chhul cancer theihna risk an nei sang leh zual. Chuvangin, i thau te paih then turin ei leh in uluk la, exercise la tha ang che.
3. Ke a kal uar rawh. Kan taksa a chet nasat hian cancer risk a tihniam tih hriat tur a ni. I rihna tihhniam nan ringawt lo pawh exercise lak hi a tha hle tih hria ang che. Exercise chuan cancer siamtu cell insiam tur a veng thei a, insulin resistance a ti chak a, a tawk chauha exercise lak chuan kan taksain natna a do let theihna pawh a tichak thin. Cancer nei tawh sa tan pawh exercise chu kan la hlawk pui tho a, cancer dam leh te pawh exercise an lak that chuan cancer rawn lan chhuah leh theihna chance a hniam bik thin. Exercise-ah chuan eng nge tha ber tih erawh a hriat bik loh. Mahse, exercise lak chuan tlai luat a nei chuang lo, i ti ngai lo a nih pawhin tan nghal rawh le.
4. Ei leh inah fimkhur rawh. Thlai leh thei a tam thei ang ber ei la, sa ti sen (red meat- vawksa, bawngsa, etc) ei tlem la, sa tin leh ei mai theih tura packed sa te pawh ei tlem rawh. Chi al ei tlem la, chawhmeh al lutuk pawh pumpelh rawh. Fibre pai tam chi ei hnem la tihna a ni ber a, a awlsam zawngin, i theih tawpin inti-vegetarian rawh.
Thei leh thlai chi hrang hrang a awm a, chutiangin cancer pawh chi hrang hrang a awm, chuvangin, eng thei leh thlai nge ei tur tih chu hriatthiam a har ang. Chubakah, i gene a zirin eng thei leh thlai nge, tih leh engzat nge ei tur tih te pawh a hrang leh thei a, chutiangin, i naupan deuh laia i ei te pawh kha tuna i ei ai mahin a lo pawimawh zawk thei.
5. Zu in tlem rawh. Chin tawk nei lo a zu in leh chiam thin hian cancer chi hrang hrang risk a tisang a, a bikin- chawkawng, ka chhung, hrawk leh aw bawm cancer risk te a tisang lehzual, zu in bawk, mei zu bawk tan phei chuan risk hi a sang lehzual. Mithiam ten zirchianna an neih hrang hrang atangin zu hian thin, colorectal leh hnute cancer risk te pawh a tisang.
Hnute cancer risk sang chi i ni emaw, hnute cancer dam leh emaw i nih chuan zu in loh tawp i tan a tha ber.
Zu chu i in a nih pawhin tlem tlemin in la. Hmeichhe tan phei chuan ni khatah no khat, mipa tan nikhatah no 1-2. Kum 65 chunglam i nih phei chuan hei aia tlem hi in ang che.
6. Medical imaging test hi a hlauhawm thei, a bikin CT scan-ah te hian radiation exposure a tam a. A tih dan tur dik taka tih pawhin CT scan vawikhatah exposure hi minuscule chauh a ni a, chu chu a hlauhawm tham lo. Mahse, radiation exposure chu kan dam chhungin a lo inkhawl khawm ve zel si a!
Imaging test chu a risk ngaihtuah chunga a tul thlu ngang a nih chauhin tih tur a ni. Diagnostic scan tih dawn reng rengin a tul tak tak em , kawng dang a awm zawk em, tih te zawt ang che- entir nan ultrasound leh MRI hmang a endik zawk theih a ni em tih te.
6. I tui hmanah Arsenic a awm leh awm loh test fo rawh. Arsenic chu chemical element rim nei lo, taste pawh nei lo a ni a, lung, lei, tui leh boruak-ah te awm thin a ni. Arsenic chu oxygen, iron, chlorine leh sulfur nen a inchawhpawlh chuan inorganic compound a siam a, chutiang chu insaknan a hman thinah te leh tui thianghlim loah te awm duh hle. Inorganic arsenic exposure a san hian phing, rilpui, kal, thin, chuap leh vun cancer risk a tisang thei.
I tui hman chu PHE tui sem a nih chuan arsenic test a ngai lo turah ngai ila.
7. Thil kan ro ei tlem rawh. Protein pai tam chi, entir nan sa, sangha leh arsa ang chi te hi, tel sa lutuk emaw, mei sa lutuk emaw a hem hian chemical chikhat heterocyclic amines (HCAs) leh polycyclic aromatic hydro-carbons (PAHs) te a siam a, chu chu cancer risk tisangtu a ni a, a bikin colorectal, pancreatic leh prostate cancer risk a tisang lehzual. Sa kan ro bakah a kang ut te pawh ei loh tur a ni a, chutiangin chawhmeh dang kang ut te pawh ei loh tur a ni.
8. Kan hnathawhna hmun a zirin cancer risk a sang thei bawk. Entir nan, chemical siamna hmuna thawk te chu te, tuialh thei hman tamna hmuna thawk leh printing lama thawk te tan benzene exposure a hlauhawm a, chu chemical chu leukemia (thisen cancer) leh Hodkin’s lymphoma thlen thei a ni. Sam siamna hmuna thawk te tan pawh formaldehyde exposure a hlauhawm bawk.
I hnathawhna hmunah cancer thlen thei laka exposure a hlauhawm a nih chuan, a ruaitu chein sorkarin hetiang lama zawm tur dan a siam te a zawm tha em tih enfiah ang che.
9. Air pollution pawhin cancer risk a tisang thei. Air pollution tih hian pawnlam boruak leh in chhung boruak a huam ve ve. Outdoor air pollution hi chu kan hrethiam mai ang a, motor khu te leh thil dang dang kan hip luh nasat hian cancer risk a tisang thei a, chutiangin in chhungah cancer risk tisang thei air pollution a awm tho bawk. In chhunga mei zuk khu kan hip luh te pawh a pawi hle. In chhung pindan siam nana kan hman plywood, particle board leh thing atanga siam thildang te hian formaldehyde an tichhuak ve thei tlat bawk.
10. In-a in awmin tukverh leh kawngka te hawng la, bathroom, choka, leh meichhemna hmun reng rengah meikhu chhuah tha tak neih a tha. Bati rimtui an tih ang chi te, boruak tih rimtuina an tih ang chi te hmang duh suh. Rannung thahna hlo (insecticides) pawh hman loh a tha ber a, i hmang a nih pawhin hmang regular suh ang che.