Car chesualah Liverpool forward Jota a thi!

Car chesualah Liverpool forward Jota a thi!
Thla liamta June ni 28 mai khan hun rei tak a khawsakpui tawh leh fa pathum hrinsaktu ni bawk Rute Cardoso chu nupui atan a nei nghet a, nipui chawlhin a zui bawk a, Premier League season liamtaa Liverpool a champion-pui lawmna hun leh honeymoon hman a inrual chhoh mek laiin nimin, Ningani zing lam khan Spain rama an chuanna car chesualah Diogo Jota chu a unaupa nen an boral!
Season liamta vek khan Jota ho hian Merseyside club chuan FA Cup leh League Cup an chawi bawk a, kum 28 mi nia a vanglai a hman mek laiin thihna kut vawtin a man ta a ni.
Liverpool Portuguese forward Jota leh a nau chetsualna hmun hi Spain ram hmar thlang lama Spanish province pakhat hming chawitu Zamora khaw hnaiha thleng niin tualchhung kangthelh pawlte chuan an sawi a; an accident hun hi Ningani zan zanlai pelh tawh niin, kum 26 leh kum 28-a upa mipa an thi tih Castille-Leon regional fire department chuan Spanish state-owned TV station an hrilh.
Police-te’n Reuters an hrilh danin an information dawn leh hmung angte a dik vek a, mitthite hming erawh official-in an la nemnghet thei lo a, mahse, Jota leh a nau an ni tih hi a chiang tawh a ni.
Portugal forward Diogo Jota nau thi ve ta, kum 26 mi Andre Silva pawh hi professional footballer tho niin, Portuguese second-tier club Penafiel tana khel lai a ni.
Thuneitute sawi danin, an hmaa lirthei dang tlanpelh an tum laiin an chuanna car changkang Lamborghini car tyre a puak thut a, kawngpui pawnah thlawkchhuakin a kang zui ta a ni.
Tarlan tak angin, Jota hian dan angin a chenpui hlun chu nupuiah a nei thar hlimhlawt a; tunhnai khan an inneih thlalak chu social media lamah a phochhuak nghe nghe.
Portuguese Football Federation (FPF) thuchhuah chuan an player thihna chu Portuguese football pumpui tan tliah hnawpna a nih thu a tarlang chungin: “PLayer mak tih hian a sawifiah zo mai lo a; ram tana match 50 a khelh tlin dawn-a-ruaiah ti hi a ni ta mai si.
“Diogo Jota hi pa ropui danglam tak niin, a team-mate zawng zawngte bakah a tumpui thinte pawhin an zah a; a chenpuite leh a thangna chin apiangah hlimna pudarhtu a ni.
“Champion pahnih kan chan a; Diogo leh Andre Silva-te thihna hi Portuguese football chhunga thlakna awm tawh lo hlohna a ni. An sulhnu chawimawi tur hian kan tih theih zawng zawng kan ti vek ang,” tiin thuchhuah chuan a tarlang.
FPF hian European football thuneitu sang ber Uefa pawh nizan Women’s Euro game-a Portugal leh Spain inkhel tan hma khan sunna hun minute khat hmang turin an dil a, an ngen ang hian minute khat chhung ngawi renga din a ni.
FC Porto pawhin sunna leh tawrhpuina thuchhuah siamin, Portugal prime minister Luis Montenegro pawhin Portugal hming tithatu Diogo Jota leh a unaupa thihna chu beisei loh chhiatna tia sawiin, mitthi chhungte a tawrhpui thu a tarlang a, football bakah national leh international sport-te tan ni lungchhiatthlak a nih thu a tarlang tel.
Football Association lam pawh an ngawi ral bik lo a, “Kan uai hnawp a ni ber e. Diogo chhungte leh thiante bakah Liverpool leh Portugal tana a khelhpuite zawng zawng kan hre reng a, thinlung takin kan tawrhpui e,” tiin thuchhuah an siam.
Jota hian kum 2016-a Atletico Madrid a zawm hma khan Pacos de Ferreira club-ah a professional career tanin, 2016-17 season khan loan-in Porto tan a khel a, khatih lai khan tuna a thihpui a nau hi Porto youth player a ni nghe nghe.
Kum 2017 atangin Jota hi England ramah a inkhel tan a; a tirah chuan Atletico atangin loan-in Wolves a zawm phawt a, a kumlehah contract nghet a ziak.
Kum 2020 khan Wolverhampton Wanderers chhuahsanin Anfield-ah a inpulut a; a thih thleng khan inelna hrang hrangah Reds tan game 182 khelin goal 65 a thun tling.
Ram tan pawh match 49 khel tlingin, goal 14 a tilut hman a; kum 2019 leh 2025 hian UEFA Nations League-ah a champion-pui bawk.
A hnuhnung zawk phei chu a nupui neih thla final-a Spain an hneh tum kha a ni nghe nghe a; a hringnuna lawmna leh hlawhtlinna lian a indawt chhoh lai takin mual a liam ta mai a ni.