Car hmanga ram pakhata zin kual thui record siam

Cheriya Konni, Thiruvananthapuram, Kerala a cheng Manikuttan GS cu India ram chhungah car-in km 69,207 a thui a zin kual a, Guinness World Record-in ram pakhat chhunga car hmanga zin thui berah a puang.
Manikuttan hi Kerala atanga inkhalh chhuakin, khawvela motor kal theihna kawng sang ber te zinga mi Khardung La, Ladakh thlengin a kal a, chuta tanga a haw leh chuan km 69,207 a thui a tlan hman a, record a siam ta a ni. A hmaa hetiang record siamtu chu American hnmeichhia niin, USA-ah ni 121 chhungin km 58,125 a thui a zin kual a ni. Manikuttan hi ni 99 chhungin India ram chhungah km 69,207 a thui a zin kual hman ve thung.
Amnikuttan hian India-a state hrang hrang 22 leh UT 6 a paltlang a, kawng ngaiah vawi khatmah a kal nawn lova, state leh UT paw vawi khatmah a tlawh nawn lo. Chawrualin nitin km 735 vel zel tlan ang a ni a, a zin kualna zawng zawng hi a motor, Mahindra XUV 500-a camera 16 a dah hmangin a record vek bawk.
A zin chhung hian kawng sira dawrah te a inhnaw puar mai tin a, a chang chuan kawng sirah eirawng a inbawl chawp ve mai thin bawk. Hetianga man tur hian inverter leh electric cooker a pai nghe nghe a ni. Tuktin zing dar 5 velah a chhuak zia a, zan dar 11 vel thleng kawngah hun a hmang thin. A chang chuan zing dar 3 thlenga tlan tum te pawh a nei.
A zin chhung hian hotel-ah ni 3 chiah a thleng a, chu pawh a motor siam a ngaih vang a ni. A zinnaah hian thawmhnaw suk vel a remchang lo a, chuvangin thawmhnaw hakthlak pair 50 chuang a keng tawp mai a ni. A zin chhung hian diesel litre 6,800 vel a hmang a, a sum sen zawng zawng hi Rs 7,00,000 vel a ni bawk.