Car number plate manto ber ‘P7’

Car number plate manto ber ‘P7’
Inrinni zan khan Four Seasons Hotel, Jumeirah, Dubai-ah ‘Most Noble Numbers’ auction an nei a, hetah hian car number ‘P7’ chu Dubai pawisa dirhams maktaduai 55 (Rs 1,22,62,44,700 vel) in an hralh a, khawvela lirthei number plate manto ber record a ni. He motor number plate hi dirhams maktaduai 15 atangin an lilam tan a, second reilote chhungin dirhams maktaduai 30 a kai nghal.
Chutah thawm a reh deuh a, mahse, French Emirati sumdawng hausa, Telegram app siamchhuaktu leh neitu Pavel Valerievich Durov-a’n dirhams maktaduai 35-a a chhan hnuah an inkhum leh ta zak zak a,a tawpah dirhams maktaduai 55-in an hralh ta a ni. A chhang huai ber hi Panel Seven atanga chhan a ni a, a chhangtu hian a nihna puanzar a duh loh avangin a hming an puang ta lo. Dirhams maktaduai 55-a an hralh chiah chu kut beng thawm a tha ham ham hle.
He lilamnaah hian VIP number plate hrang hrang leh phone number te pawh lilam tel a ni a, heta tanga an sum hmuh te chu Ramadan a mipui te ei tur a thlawna sem nan an hmang dawn a, he lilamna atanga an sum hmuh zawng zawng hi dirhams maktaduai 97.92 a tling. A event hi Emirates Auction bakah Dubai Roads and Transport Authority leh telecommunication company pahnih Etisalat leh Du te buatsaih a ni.
A hmaa motor number plate manto ber record chu 2008-a sumdawn hausa pakhatin Abu Dhabi number ‘1’ plate dirhams maktaduai 52.22-a a lei a ni a, he record hi khum tumin mihausa tam takin an inchhan huai siak a ni. He lilamnaa an sum hmuh hi Vice President leh Ruler of Dubai, Sheikh Mohammed bin Rashid hmalakna ‘One Billion Meals’ campaign-ah an chhung lut dawn a, he campaign hi khawvel hmun hrang hranga ei tur kham khawp hmu lo ten eitur an neih theih nan an sem chhuak leh dawn a ni.