Carabao Cup champion United

February 26, Pathi-anni zan khan English Carabao Cup final khelh a ni a. Wembley Stadium-a inkhel hmuh-nawm takah si hnih faia Newcastle United hnehin Manchester United an champion. Kum 6 zet trophy lian lak nei lova hun an hman hnuin Erik ten Hag hnuaiah a vawi khat nan United in trophy an la ve leh ta a. Carabao Cup-a an champion hi United ropui nawn lehna tura an ke chheh hmasa nia ngaih a ni.
Khelmual ropui Wembley Stadium-ah Manchester United leh Newcastle United ten inkhel hmuhnawm an lantir a, si nghak chet that zanah United si nghak David de Gea a ropui zawk a, goal a chhuah lo. United si nghak ropui De Gea hian club record thar a siam a, United si nghak zawm tawh zawng zawng zingah clean sheet ngah ber a ni. Goal hnih chhuah bawk mah se Newcastle si nghak Loris Karius a che chho lo viau bawk.
English club ropui ber ni chunga kum ruk chhung zet trophy lian la thei tawh lo United lakah Newcastle in bul an tan tha a, goal thun theihna hun tha an nei hmasa zawk. Fuh taka ball an inpek kual hnuah Alan Saint-Maximin chuan mawi zetin Diogo Dalot a bum leh zet a, chep tak kar atanga a pet tha tak chu si nghak De Gea-a’n a lo dang hman hlauh thung a, United an him hram.
Goal chhuah hmasa zawka an tan teuh viau hnuah United in hun tha an hmu zui a, goal thun hmasa zawkah an tang. Luke Shaw ball vawrh luh tha tak chu midfielder Casemiro chuan rang zetin a tauh goal a, minute 33-naah hmahruaina goal a thun.
Goal an chhuah hnuin Newcastle in an khingpuite an nawr let thuai a, goal thun an tum luatah an chesual zui leh ta tlat thung. United hian fuh zetin an khingpuite an nawr let a. Loan-a an hawh mek Wout Weghorst a ball pek tha tak chu tunlaia che tha em em Marcus Rashford chuan chak takin a khalh tlang a, chep tak kar atanga a pet chu Magpies defender Sven Botman chuan si nghak man theih rual lohin a dang pial lut a, minute 39-naah United in an goal hnihna an thun.
Si hnih faia hmahruai tawh United hi chawlhlawk hnu lamah hahdam zawkin an inlan a, an khingpuiten an chai buai phak meuh tawh lo. Newcastle tan hian Jacob Murphy chuan shot tha tak a nei naa an si phurh a sut thei bik chuang lo. Hun tawp thlengin United pawhin goal dang an thun belh thei tawh bik lova, si hnih faia hnehna changin, United hi an champion zui ta a ni.
Kum ruk chhhung zet inelna liana an champion theih loh hnuin United hian Ajax hlawhtlinpuitu Erik ten Had chu beiseina sang tak nen an la lut. Ten Hag hnuaiah hian bul tan tha vut lo mah se an hma an sawn hret hretah Ten Hag hnuaia a vawikhat nan English Carabao Cup-ah an champion ta hial a ni. Carabao Cup champion thar United hi FA Cup leh Europa League-ah la damin champion tura rinkai an ni a. Premier League lamah pawh champion thei dinhmunah an ding mek bawk.
Newcastle United lakah goal chhuah lova United champion puitu David de Gea khan United tan clean sheet vawi 181 zet a neiin, United tan clean sheet nei tam ber record a siam a. United tana clean sheet ngah ber ni thin Peter Schmeichel a record chu De Gea hian a khum ta chiah a ni.
Carabao Cup final-ah Manchester United hneh lova an tlawm leh tak vangin Newcastle United hian kum 1969-ah trophy lian lak an tumna an puitlin zo lova, kum 54 zet hnua champion an tumna chu sarah a zam ral leh ta rih. Season tharah champions lague khelh phak beisei Magpies hian team lian Manchester City an hmachhawn zui leh a ngai dawn.