Catalunya MotoGP thlirletna

Pathianni 2026 Catalan MotoGP race-ah chetsualan lian tham tum hnih thlengin, chu chuan red flag a kai chhuak a, BK8 Gresini Racing rider Alex Marquez phei chuan damdawi in luhpui hial ngaiin a nghawng ruh a sawh auh a; rider hrem tawk an awm avangin result pawh siamdanglam hial a ni!
Fabio di Giannantonio chak tum hian runner-up Joan Mir telin rider pangate chu low tyre pressure avangin post-race penalty pek an ni a; an buai nuai nuai hnu 12-lap restarted race zawh ruala investigation an kalpui hnuah Joan Mir (2nd), Pecco Bagnaia (4th), Alex Rins (11th), Jack Miller (14th, Toprak Razgatlioglu (15th) leh Raul Fernandez (16th)-te chu hremna pek an ni.
Penalty an puan hnu hian result pawh ennawn nghal a ni a, Ducati rider Fabio Di Giannantonio chu pakhatna a ni chhunzawm a; Honda rider Joan Mir chu pahnihna atangin 13-naah a chhuk a, a aiah Gresini Ducati khalhtu Fermin Aldeguer chuan runner up dinhmun luah chhoin, Ducati Lenovo rider Francesco Bagnaia chu lawmman semna dawhsan hniam ber luahtu a ni thung.
Spanish rider Mir tan Catalan Grand Prix kha tun season-a podium a lawnkai vawi khatna a nih laiin 16-second post-race penalty hmu rider panga zingah a tel leh ta si a, top three a chang pha leh ta rih lo!
Original 24-lap race-a chetsualna liantham hmasa chu lap 12-naa thleng niin, Alex Marquez leh Pedro Acosta-te chu an tlan chak lai takin an chesual dun a; restart hmasaberah a hlawpa chetsualna thleng zui lehin, Johann Zarco, Luca Marini leh Pecco Bagnaia-te an talbuai a; Moto2 champion hlui Zarco phei hi chu a ke hliam endik turin damdawi in panpui a ni zui ve leh bawk.
Restart vawi hnihnaah VR46 Ducati khalhtu Fabio Di Giannantonio a dingchang ta a ni.
Tarlan tak angin, pathumnaa thleng Fermin Aldeguer chuan Mir tlakhniam vangin pahnihna a luah chho a; Bagnaia pawh pathumnaa hlankai niin, tun season-a Ducati team-in grand prix podium an chan vawi khatna a ni zui ta nghe nghe.
Spaniard Bagnaia tan tun kha nikum Japanese Grand Prix hnu lama podium a luah leh vawi khatna ni nghalin, thang khat lian zet hnua Ducati factory team-in lawmman semna dawhsan an luah phak loh rei ber hun kal tluang mek a rawn tihtawpsak ta a ni.
Aprilia rider Marco Bezzecchi pawhin hrem tuar awm hlawkpuiin point hnih a hmuh belh a, palinaah a chho ve bawk.
A hma chiah kartawp France rama a kephah ruh a tih-auh avangin Pathianni Catalunya MotoGP race-ah khan reigning champion Marc Marquez a inlan thei lo.